FDA Raid – ​पिंपरी येथील यशवंतराव चव्हाण स्मृती (वायसीएम) रुग्णालयातील कँटीनमधील अन्नाच्या दर्जाबाबत गंभीर तक्रारी प्राप्त झाल्यानंतर, अन्न व औषध प्रशासनाने (FDA) धडक कारवाई केली आहे. अन्न सुरक्षा मानकांचे उल्लंघन आणि अस्वच्छता आढळून आल्यामुळे प्रशासनाने कँटीन चालकाला १४ दिवसांची ‘कारणे दाखवा’ नोटीस बजावली आहे.

‘वायसीएम’ रुग्णालयात दररोज उपचारासाठी येणारे रुग्ण आणि त्यांच्या नातेवाइकांना निकृष्ट दर्जाचे अन्न दिले जात असल्याच्या तक्रारी वारंवार येत होत्या. या तक्रारींची दखल घेत एफडीएच्या विशेष पथकाने रुग्णालयाच्या कँटीनमध्ये अचानक धाड टाकली. या तपासणीदरम्यान कँटीनमध्ये अस्वच्छता, निकृष्ट दर्जाचे साहित्य आणि अन्न सुरक्षेच्या नियमांचे उघड उल्लंघन होत असल्याचे अधिकाऱ्यांच्या निदर्शनास आले.

​तपासणी पथकाने कँटीनमधून भेसळीच्या संशयावरून चार वेगवेगळ्या खाद्यपदार्थांचे नमुने गोळा केले असून ते तपासणीसाठी शासकीय प्रयोगशाळेत पाठवले आहेत. या प्रयोगशाळेचा अहवाल प्राप्त झाल्यानंतर नियमानुसार संबंधित चालकावर कठोर कायदेशीर कारवाई केली जाणार असल्याचे एफडीएने स्पष्ट केले आहे. कँटीन व्यवस्थापनाला अन्न सुरक्षेच्या नियमांचे तत्काळ पालन करून सुधारणा करण्याचे सक्त निर्देश देण्यात आले आहेत.

रुग्णांच्या आरोग्याशी खेळणाऱ्या या प्रकारामुळे रुग्णालय वर्तुळात मोठी खळबळ उडाली असून एफडीए आणि रुग्णालय प्रशासन या प्रकरणाची पुढील चौकशी करत आहे. दरम्‍यान याच कॅन्‍टीनमध्‍ये ग्राहकांच्‍या टेबलावर पिण्‍यासाठी पाणी दिले जात नाही. विकतचे पाणी घेण्‍यासाठी हा प्रकार केला जात असल्‍याचा आरोप रुग्‍ण आणि त्‍यांच्‍या नातेवाईकांनी केला आहे. एकदा पाणी सांडून त्‍यावरून रुग्‍ण पडला, असे उत्‍तर कॅन्‍टीन चालक देतो.