YCM Hospital – आधुनिक वैद्यकीय शिक्षणाची गुणवत्ता, रुग्णसुरक्षा आणि वैद्यकीय नियमन कायम ठेवण्याची मागणी करत पिंपरी-चिंचवड महापालिकेच्‍या यशवंतराव चव्‍हाण स्‍मृती रुग्णालयातील निवासी डाॅक्‍टरांनी आंदोलन केले. महाराष्ट्र शासनाने सीसीएमपी अभ्यासक्रम पूर्ण केलेल्या बीएचएमएस डॉक्टरांना महाराष्ट्र मेडिकल कौन्सिलमध्ये नोंदणी देण्याच्या निर्णयाविरोधात राज्यभर सुरू असलेल्या आंदोलनाला पाठिंबा देत पिंपरी-चिंचवड महापालिकेच्या पदव्युत्तर वैद्यकीय शिक्षण संस्था (पीसीएमसी,पीजीआय) व यशवंतराव चव्हाण स्मृती रुग्णालय (वाय सी एम एच ) येथील निवासी डॉक्टरांनी गुरुवारी निषेध आंदोलन केले.

या आंदोलनात एकूण ५७ पदव्युत्तर (पीजी) निवासी डॉक्टरांनी सहभाग घेतला. आधुनिक वैद्यकीय शिक्षणाची गुणवत्ता अबाधित राखणे, रुग्णांची सुरक्षितता सुनिश्चित करणे आणि पुराव्यावर आधारित (साक्ष्य आधारित) वैद्यकीय सेवेचे संरक्षण करणे या प्रमुख मागण्यांसाठी शासनाने संबंधित निर्णयाचा फेरविचार करावा, अशी मागणी आंदोलनकर्त्यांनी केली.

राज्यातील विविध निवासी डॉक्टर संघटनांकडून याच मुद्द्यावर आंदोलन सुरू असून अनेक ठिकाणी नियमित सेवांमधून प्रतीकात्मक माघार घेण्यात आली आहे. त्याच पार्श्वभूमीवर पीसीएमसी,पीजीआय आणि वाय सी एम रुगणालयातील डॉक्टरांनीही या आंदोलनात सहभाग नोंदविला.आंदोलनाचे नेतृत्व अध्यक्ष डॉ. महागुंड्या वस्त्रद, उपाध्यक्ष डॉ. मिहीर जैन, उपाध्यक्षा डॉ. अंकिता पोल, सरचिटणीस डॉ. सौरभ रामाणे आणि डॉ. प्राची मोरे यांनी केले.

यावेळी पदाधिकाऱ्यांनी सांगितले की, निवासी डॉक्टरांचा हा लढा कोणत्याही वैद्यकीय पद्धतीच्या विरोधात नसून आधुनिक वैद्यकीय शिक्षणाची गुणवत्ता, वैद्यकीय नियमनातील स्पष्टता आणि रुग्णहिताचे संरक्षण यासाठी आहे. शासनाने या निर्णयाचा फेरविचार करून वैद्यकीय क्षेत्रातील सर्व संबंधित घटकांशी सविस्तर चर्चा करावी, अशी मागणी त्यांनी केली.आंदोलनादरम्यान रुग्णालयातील अत्यावश्यक सेवा सुरळीत सुरू ठेवण्यात आल्या असून आंदोलन शांततापूर्ण वातावरणात पार पडले.