Pune FDA Raid : अन्न व औषध प्रशासनाच्या तपासात अलब्युरेल नावाचे औषध बनावट बाजारात विक्री होत असल्याचे निष्पन्न झाले. या प्रकरणी पुणे, मुंबई, नागपूर आणि रायगड येथील पाच ठोक विक्रेत्यांविरुध्द गुन्हा दाखल करण्यात आला आहे. जनतेच्या आरोग्याशी खेळ करणाऱ्या या रॅकेटचा उलगडा औषध निरीक्षक श्रुतिका जाधव यांच्या फिर्यादीवरून झाला आहे. पोलिसांनी सांगितले की, अन्न व औषध प्रशासन, महाराष्ट्र राज्याच्या पुणे विभागात कार्यरत असलेल्या औषध निरीक्षक श्रुतिका जाधव यांनी २८ जुलै २०२५ रोजी सदाशिव पेठ येथील मे. मैत्री फार्मास्युटीकल्स येथे तपासणी केली. तेथून अलब्युरेल व रिच्यूएक्सरेल या औषधांचे नमुने घेऊन ते शासकीय विश्लेषक, मुंबई यांच्याकडे तपासणीसाठी पाठविण्यात आले. शासकीय विश्लेषकांच्या अहवालानुसार अलब्युरेल हे औषध या. पी. चाचणीमध्ये अपयशी ठरले असून ते औषधे व सौंदर्य प्रसाधने कायदा १९४० च्या कलम १७ (ब) अन्वये बनावट घोषित करण्यात आले आहे. तपासादरम्यान या बनावट औषधाची खरेदी-विक्री साखळीत मे. मैत्री फार्मास्युटीकल्स (सदाशिव पेठ, पुणे), मे. श्री साई लॉजिस्टिक (नागपूर), एम/एस नेक्सस लाईफकेअर प्रा. ली. (दादर (पूर्व), मुंबई), एन आर एक्स डिस्ट्रीब्युटर्स एलएलपी (सायन, मुंबई), एम/एस आरआरटी फार्मा (कामोठे, रायगड) या सर्वांनी संगनमत करून बनावट औषधांची खरेदी-विक्री केल्याचा आरोप आहे.
