वाघोली : वाडेबोल्हाई (ता. हवेली) येथील एका नामांकित हॉटेलविरोधात खाद्य परवाना असतानाही ग्राहकांना मद्यपानासाठी सुविधा उपलब्ध करून दिली जात असल्याचा आरोप करण्यात आला आहे. याप्रकरणी वाघोली येथील एका युवकाने लोणीकंद पोलीस ठाण्यात लेखी तक्रार दाखल केली आहे. या तक्रारीच्या अनुषंगाने पोलिसांकडून चौकशी सुरू करण्यात आली असून, संबंधित हॉटेलमधील कथित प्रकाराचा एक व्हिडिओ समाजमाध्यमांवर प्रसारित झाल्याचेही तक्रारीत नमूद करण्यात आले आहे.

तक्रारदाराच्या म्हणण्यानुसार, वाडेबोल्हाई रोडवरील संबंधित हॉटेलमध्ये काम करणार्‍या कर्मचार्‍यांची चारित्र्य पडताळणी करण्यात आलेली नसल्याचा आरोप आहे. तसेच हॉटेल ज्या ठिकाणी उभारण्यात आले आहे, त्या ठिकाणी पूर्वी नाला असल्याचा दावा तक्रारीत करण्यात आला असून, नाला बुजवून बांधकाम करण्यात आल्याचेही नमूद करण्यात आले आहे. संबंधित हॉटेलमध्ये मद्यविक्री अथवा मद्यपानाची अधिकृत परवानगी नसतानाही काही ग्राहक मद्यपान करत असल्याचा आरोप तक्रारदाराने केला आहे. तसेच हॉटेलमध्ये काम करणारे कर्मचारी अतिरिक्त पैसे घेतल्यानंतर मद्य आणून देतात आणि मद्यपानासाठी हॉटेलच्या वरच्या मजल्यावर व्यवस्था केली जात असल्याचा दावाही तक्रारीत करण्यात आला आहे.

हॉटेलला पुरेशी पार्किंग व्यवस्था नसल्याने ग्राहकांची वाहने रस्त्यावर उभी केली जातात. त्यामुळे या परिसरात वाहतूक कोंडी होऊन अपघाताचा धोका निर्माण होत असल्याचे तक्रारदाराने म्हटले आहे. संबंधित हॉटेल चालकाकडे आवश्यक अधिकृत परवाने आहेत का, याची तपासणी करून नियमांचे उल्लंघन आढळल्यास कायदेशीर कारवाई करावी, अशी मागणी वरिष्ठ पोलीस निरीक्षकांकडे करण्यात आली आहे.

संबंधित युवकाने एका नामांकित हॉटेलविरोधात दिलेल्या तक्रार अर्जानुसार चौकशी सुरू करण्यात आली असून, जाबजबाब नोंदविण्याचे काम सुरू आहे. चौकशीनंतर दोषी आढळल्यास योग्य ती कायदेशीर कारवाई करण्यात येईल.
-सुनिता रोकडे, वरिष्ठ पोलीस निरीक्षक, लोणीकंद पोलीस ठाणे