नियम मोडणाऱ्या ट्रकचालकांवर गुन्हे दाखल करणार; बहुभाषिक फलक लावण्याची एमएसआरडीसीकडे मागणी
Expressway: मुंबई-पुणे द्रुतगती मार्गावरील कनेक्टिंग लिंकवर अवजड वाहनांना प्रवेशबंदी असतानाही येथून जाणाऱ्या ट्रक, कंटेनरचालकांविरुद्ध महामार्ग सुरक्षा पथकाकडून (एचएसपी) गुन्हे दाखल करण्यात येणार आहेत. या मार्गावर अवजड वाहनांना प्रवेशबंदी असल्याचे स्पष्ट करणारे फलक विविध भाषांमध्ये लावण्याची मागणीही महाराष्ट्र राज्य रस्ते विकास महामंडळाकडे (एमएसआरडीसी) करण्यात आली आहे.

मुंबई-पुणे द्रुतगती मार्गावरील कनेक्टिंग लिंक वाहतुकीसाठी खुली केली आहे. या मार्गावरून ट्रक, कंटेनर आणि इतर अवजड वाहनांच्या वाहतुकीस एमएसआरडीसीने बंदी घातली आहे. खासगी लक्झरी बस आणि इतर बसना मात्र या मार्गावरून जाण्याची परवानगी आहे. असे असतानाही अनेक अवजड वाहने या मार्गावरून जात असतात.

६ ऑक्टोबर रोजी एका ट्रकची खासगी लक्झरी बसला धडक बसली. अपघातात बसमधील पाच प्रवासी गंभीर जखमी झाले. घटनेनंतर अवजड वाहनांच्या प्रवेशबंदीची अंमलबजावणी करण्याचा निर्णय महामार्ग सुरक्षा पथकाने घेतला आहे.

महामार्ग सुरक्षा पथकाचे पुणे विभागाचे पोलीस अधीक्षक शिवाजी पवार यांनी सांगितले की, अनेक ट्रकचालकांना कनेक्टिंग लिंकवरील प्रवेशबंदीच्या नियमाची माहिती नाही. त्यामुळे या मार्गाच्या प्रवेशापूर्वीच अवजड वाहनांना बंदी असल्याचे स्पष्ट करणारे फलक लावण्याची मागणी एमएसआरडीसीकडे केली आहे. तमिळ, तेलुगू आणि कन्नड भाषांमध्येही हे फलक लावल्यास संबंधित वाहनचालकांना नियम समजण्यास मदत होईल.

सध्या महामार्ग सुरक्षा पथक कर्मचारी कनेक्टिंग लिंकच्या प्रवेशाजवळ तैनात आहेत. एलईडी बॅटनच्या साहाय्याने ट्रकचालकांना जुन्या द्रुतगती मार्गावरून जाण्याच्या सूचना दिल्या जात आहेत. प्रवेशबंदीचे उल्लंघन करून कनेक्टिंग लिंकवर अवजड वाहने आणणाऱ्या चालकांविरुद्ध आता गुन्हे दाखल केले जाणार आहेत. यासाठी या मार्गावर स्वतंत्र पथक तैनात करण्यात येणार असून, संबंधित पोलीस ठाण्यात गुन्हे नोंदवले जाणार असल्याचे पवार यांनी स्पष्ट केले.