Kolkata rape-murder : महिला डॉक्टरवरील बलात्कार आणि तिची हत्या झाल्याच्या प्रकरणावरून पश्चिम बंगालमध्ये संतापाची लाट उसळली आहे. डॉक्टरांचीही राज्यसभरात निदर्शने सुरू आहेत. अशातच आता राज्यातील तृणमूल कॉंग्रेस या सत्ताधारी पक्षाच्या एका खासदाराने वादग्रस्त विधान केले आहे. डॉक्टरांच्या संपामुळे लोकांचा जर डॉक्टरांच्या विरोधात उद्रेक झाला तरी आम्ही सुध्दा डॉक्टरांना वाचवू शकणार नाही असे खासदार अरूप चक्रवर्ती यांनी म्हटले आहे. रविवारी एका रॅलीत डॉक्टरांना उद्देशून बोलताना अरूप चक्रवर्ती म्हणाले की, आंदोलनाच्या नावावर तुम्ही घरी जाउ शकाल किंवा तुमच्या प्रियकर- प्रेयसीसोबत फिरायला जाऊ शकाल. मात्र तुमच्या या संपाच्या कारणामुळे कोणा आजारी व्यक्तीचा मृत्यू झाला आणि त्यामुळे लोकांच्या संतापाचा उद्रेक झाला तर आम्ही तुम्हाला वाचवणार नाही. विशेष म्हणजे भाषण संपल्यावर जेंव्हा चक्रवर्ती व्यासपीठावरून खाली उतरले तेंव्हा माध्यमांच्या प्रतिनिधींनी या विधानाबाबत छेडले असता ते त्यावर ठाम होते. अरूप चक्रवर्ती म्हणाले की डॉक्टर संपावर आहेत. त्या नावाखाली जर ते बाहेर जात असतील आणि लोकांना उपचार मिळत नसतील तर त्यांना संताप येणे स्वाभाविक आहे. तसे झाले तर आम्ही काय करू शकणार आहे? विशेष म्हणजे १४ ऑगस्ट रोजीच निदर्शने करणाऱ्या डॉक्टरांवर काही जणांनी हल्ला केला होता. हल्ला करणारे गुंड होते आणि त्यांनी आर जी कार रूग्णालयात घुसून आंदोलक डॉक्टरांवर आणि तेथे बंदोबस्ताला असलेल्या पोलिसांवरही हल्ला केला होता. यावेळी मोठी तोडफोड करण्यात आली. दरम्यान, तृणमूल कॉंग्रेसने आंदोलन करणाऱ्या डॉक्टरांचे समर्थन केले असून हल्लेखोरांवर कारवाईची मागणी केली आहे.
