हडपसर : मुख्यमंत्री असताना आणि आता उपमुख्यमंत्री असतांनाही सर्व सामान्य जनतेसाठी अहोरात्र काम करणाऱ्या एकनाथ शिंदे साहेबांच्या पाठीशी लोक भक्कमपणे उभे आहेत.याचा माझ्यासारख्या शिवसेनेतील असंख्य कार्यकर्त्यांना अभिमान आहे, अशी भावना शिवसेना शहर प्रमुख प्रमोदनाना भानगिरे यांनी व्यक्त केली.

विधानसभा निवडणुकीत महायुतीला मतदारांनी अभूतपूर्व प्रतिसाद दिला.त्याबद्दल मतदारांचे आभार मानण्यासाठी शुक्रवारी ( दि.३१) उपमुख्यमंत्री एकनाथ शिंदे यांची सासवड येथील पालखी तळावर आभार सभा होणार आहे. त्यानिमित्ताने या सभेचे नियोजन व हडपसर विधानसभा मतदारसंघातून अधिकाधिक पदाधिकारी कार्यकर्ते या सभेला उपस्थित राहण्याच्या संबंधित नियोजन करण्यासाठी आयोजित केलेल्या बैठकीत नाना भानगिरे बोलत होते.

शहरप्रमुख भानगिरे म्हणाले की झालेल्या विधानसभा निवडणुकीत एकनाथ शिंदे साहेबांच्या नेतृत्वात महायुतीला घवघवीत यश मिळाले आहे. त्यामध्ये पुणे शहर असेल हडपसर विधानसभा मतदारसंघ असेल पुरंदर हवेली मतदारसंघ असेल या ठिकाणीही आपले महायुतीचे उमेदवार विजयी झाले. यात मतदारांचे मानावे तेवढे आभार कमी आहेत.

आज प्रत्यक्ष उपमुख्यमंत्री एकनाथ शिंदे हे मतदारांचे आभार मानण्यासाठी येत आहेत.त्यातून आम्हां कार्यकर्त्यांनाही मोठी ऊर्जा मिळणार आहे. शिंदे साहेबांच्या पाठीशी पुणे शहर आणि जिल्ह्यातील जनतेने मोठी ताकद उभी केली आहे. जनतेची कामे करून ही ताकद अशीच कायम ठेवण्याची जबाबदारी आम्हा कार्यकर्त्यांची असून येणाऱ्या महानगरपालिकेच्या निवडणुकीतही पालिकेवरती महायुतीचा झेंडा फडकेल, असा विश्वासही यावेळी नाना भानगिरे यांनी व्यक्त केला. सभेच्या या नियोजन बैठकीला हडपसर विधानसभा मतदारसंघातील तसेच पुणे शहरातील शिवसेना पक्षाचे विविध पदाधिकारी व कार्यकर्ते मोठ्या संख्येने उपस्थित होते.