मुंबई – बॉलिवूड सिनेमाची ओळख बदलणारा आणि कोणत्याही अभिनयात प्रेक्षकांच्या काळजाला हात घालणारा अभिनेता म्ह्णून नवाजुद्दीन सिद्दीकीकडे पाहिले जाते. गँग्ज ऑफ वासेपूर सारख्या चित्रपटातून कमालीचा अभिनय साकारणाऱ्या नवाजाने बॉलीवूडला वास्तविक चित्रपटांचा आरसा दाखवला आणि भल्या भल्यांना आपल्या अभिनयाची दखल घेण्यास भाग पाडले. सिनेमाबाबत कोणतीही पार्श्वभूमी नसताना नवाजने आज मोठं यश मिळवलं आहे. म्हणूनच कान्स सारख्या बड्या फेस्टिव्हलमध्ये देखील तो दिसून येतो. नुकतच नवाजने आपल्या अभिनयाबाबत भाष्य करताना पैशांबाबतचा मोठा खुलासा केला.

वास्तवदर्शीपणा आणि कमर्शेअलनेस यांचा अद्भुत संगम साधत नवाजने आपल्या करिअरमध्ये फोटोग्राफ,लंच बॉक्स,मांजी यासारखे अनेक दर्जेदार चित्रपट केले. त्यासोबतच काही कमर्शेअल सिनेमांमध्ये देखील तो दिसला अर्थात त्यामध्ये अभिनयाला कोणताही स्कोप नव्हता. सध्या तो एका हॉलिवूड चित्रपटात देखील दिसणार आहे. ‘लक्ष्मण लोपेज’ असं या सिनेमाचं नाव असून रॉबर्टो जिरॉल्ट हे या सिनेमाचे दिग्दर्शक आहेत.

या सिनेमा निमित्त दिलेल्या मुलाखतीत नवाज म्हणतो, मी आजवर अनेक चित्रपटांमध्ये छोट्या छोट्या भूमिका साकारल्या. परंतु आता परदेशी चित्रपटात प्रमुख भूमिका असेल तरच मी तो चित्रपट करणार आहे. या आधी मी छोट्या भूमिका देखील मनापासून केल्या परंतु आता मला २५ कोटी जरी दिले तरी मी छोटी भूमिका साकारणार नसल्याचे नवाज म्हणतो.