Main Actor Nahi Hoon Teaser: अभिनेता नवाजुद्दीन सिद्दीकी यांचा आगामी ‘मैं एक्टर नहीं हूं’ हा चित्रपट सध्या चर्चेत आला आहे. या चित्रपटाचा टीझर नुकताच प्रदर्शित करण्यात आला असून प्रेक्षकांकडून त्याला चांगला प्रतिसाद मिळत आहे. या चित्रपटात नवाजुद्दीन सिद्दीकी यांच्यासोबत चित्रांगदा सतरूपा मुख्य भूमिकेत दिसणार आहेत. टीझर पाहताना हा चित्रपट एखाद्या पारंपरिक सिनेमापेक्षा डॉक्युमेंट्रीसारखा वाटतो, ही त्याची खासियत आहे. या चित्रपटाचे दिग्दर्शन आदित्य कृपलानी यांनी केले आहे. त्यांनीच त्यांच्या यूट्यूब चॅनलवर आणि सोशल मीडियावर हा टीझर शेअर केला आहे. टीझरसोबत त्यांनी एक खास संदेशही दिला आहे…. “तुम्ही कधी अभिनेता होण्याचं स्वप्न पाहिलं आहे का?” या एका प्रश्नातूनच चित्रपटाची थीम समोर येते. ‘मैं एक्टर नहीं हूं’ हा चित्रपट एका बँकरच्या आयुष्यावर आधारित आहे. हा बँकर भारत आणि जर्मनी या दोन देशांमध्ये राहत असतो. त्याच्या आयुष्यात एक टप्पा असा येतो, जेव्हा त्याला अभिनयाची आवड निर्माण होते. तो एक अभिनेता बनण्याचा प्रयत्न करतो आणि त्यासाठी प्रशिक्षण घेऊ लागतो. ही त्याच्या संघर्षाची आणि स्वप्नपूर्तीची कथा या चित्रपटातून मांडली जाणार आहे. Main Actor Nahi Hoon Teaser: Nawazuddin Siddiqui टीझरमध्ये नवाजुद्दीन सिद्दीकी यांचा वेगळाच अंदाज पाहायला मिळतो. ते एका मानसोपचार तज्ज्ञाकडे (सायकोलॉजिस्ट) जाताना दिसतात. त्यांना अॅन्झायटीची समस्या असल्याचे दाखवले आहे. त्याचवेळी त्यांना अभिनयाची आवड असल्याचे समोर येते. त्यानंतर त्यांचा अभिनयाचा प्रवास सुरू होतो. या सगळ्या प्रवासात भावनिक आणि वास्तवदर्शी बाजू अधोरेखित केली आहे. या टीझरची एडिटिंग ऋषिकेश पेटवे यांनी केली असून त्यातील पार्श्वसंगीत आणि लोकेशन्स प्रेक्षकांना विशेष आवडत आहेत. सोशल मीडियावर अनेक यूजर्सनी या टीझरचं कौतुक केलं आहे. काहींनी “चित्रपट खूप वेगळा वाटतोय” असं म्हटलं आहे, तर काहींनी “हा चित्रपट पाहण्यासाठी उत्सुक आहोत” अशा प्रतिक्रिया दिल्या आहेत. महत्त्वाची बाब म्हणजे हा चित्रपट ८ मे २०२६ रोजी सिनेमागृहात प्रदर्शित होणार आहे. नवाजुद्दीन सिद्दीकी यांची नेहमीच वेगळी आणि प्रयोगशील भूमिका असते, त्यामुळे या चित्रपटाबाबतही प्रेक्षकांमध्ये उत्सुकता निर्माण झाली आहे. ‘मैं एक्टर नहीं हूं’ हा चित्रपट अभिनय, स्वप्नं आणि आत्मशोध यांचा प्रवास दाखवणारा एक वेगळा अनुभव देईल, अशी अपेक्षा व्यक्त केली जात आहे.
