प्रभात वृत्तसेवा मंचर – जवळे (ता.आंबेगाव) येथे विजेचा शॉक लागून ३७ वर्षीय महिलेचा मृत्यू झाला असल्याची घटना शुक्रवार, दि. १७ रोजी सकाळी दहा वाजण्याच्या दरम्यान घडली आहे.रेखा संदीप गावडे (वय ३७) असे मयत झालेल्या महिलेचे नाव असून या महिलेला विजेचा शॉक लागला.त्यावेळी तिला वाचवण्यासाठी गेलेली तिची बहीण शिल्पा नारायण गावडे, दीर नारायण बाळासाहेब गावडे हे दोघे जखमी झाले आहेत.याबाबत अधिक माहिती अशी की शुक्रवारी सकाळी नेहमीप्रमाणे रेखा गावडे या धुतलेले कपडे घराजवळील तारेवर वाळत घालता असताना तारेमध्ये उतरलेल्या वीज प्रवाहाचा त्यांना धक्का बसला. त्या मोठ्याने ओरडल्या व खाली जमिनीवर पडल्या.खाली पडलेल्या पाहून त्यांची बहीण शिल्पा गावडे, दिर नारायण गावडे हे त्यांना वाचवण्यासाठी आले असता त्यांनाही विजेचा धक्का बसला. त्यावेळी तेथे घरातील रोहित गावडे यांनी पकडीच्या सहाय्याने सर्विस वायर कट केल्यामुळे पुढील मोठा अनर्थ टळला. रेखा गावडे यांना तात्काळ मंचर उपजिल्हा रुग्णालयात दाखल केल्या असता डॉक्टरांनी मयत झाल्याचे घोषित केले. अशी माहिती उद्योजक सतीश खालकर आणि पोलीस पाटील रवींद्र लोखंडे यांनी दिली.जखमी नारायण गावडे यांच्यावर रुग्णालयात उपचार सुरू आहेत.तर शिल्पा गावडे यांच्या वर वैद्यकीय उपचार करून घरी सोडण्यात आले.गावडे यांचे एकत्र कुटुंब असून त्याच्या पाठीमागे मुलगा, मुलगी, पती, दीर, जाव असा मोठा परिवार आहे.
