Road Accident : भीमाशंकर–मंचर मार्गावरील पोखरी घाटात इको गाडी दरीत कोसळून झालेल्या भीषण अपघातात चालकासह दोघांचा मृत्यू झाला. या अपघातात चार जण गंभीर जखमी झाले. चालकाचे वाहनावरील नियंत्रण सुटल्याने गाडी थेट दरीत कोसळली. दरीत कोसळताना गाडीने अनेक पलट्या घेतल्या. यात गाडीचा पूर्णपणे चेंदामेंदा झाला.

एमएच १४/केडब्ल्यू २०९१ क्रमांकाची इको गाडी घोडेगावहून भीमाशंकरच्या दिशेने जात होती. या गाडीत आदिवासी भागातील स्थानिक नागरिक प्रवास करत होते. ही गाडी डिंभे येथील गोरक्ष राक्षे यांच्या मालकीची आहे. ज्ञानेश्वर गोविंद गवारी (वय ४१, रा. ढगेवाडी) हे गाडी चालवत होते.

पोखरी घाटात चालकाचे नियंत्रण सुटल्याने गाडी दरीत कोसळली. या अपघातात चालक ज्ञानेश्वर गवारी आणि अंदाजे ७० वर्षांच्या एका अनोळखी महिलेचा मृत्यू झाला. मृत महिला स्थानिक रहिवासी असल्याची माहिती असून, तिची ओळख अद्याप पटलेली नाही.

अपघातात कांचन संदीप केंगले (वय ३५, रा. जांभोरी, नांदुरकीचीवाडी, ता. आंबेगाव), योगेश देवराम भांगे (वय २६, रा. तांबे, ता. जुन्नर), शिवाजी मारुती डामसे (वय ६०, रा. कोंढवळ, ता. आंबेगाव) आणि सुभद्रा प्रमोद केंगले (वय ४०, रा. जांभोरी, ता. आंबेगाव) हे चौघे गंभीर जखमी झाले.

अपघाताची माहिती मिळताच परिसरातील गावांतील नागरिकांनी घटनास्थळी धाव घेतली. रुग्णवाहिका दाखल झाल्यानंतर स्थानिक नागरिकांच्या मदतीने जखमींना दरीतून बाहेर काढण्यात आले. जिल्हा परिषदेचे उपाध्यक्ष विवेक वळसे पाटील यांनीही कार्यकर्त्यांसह घटनास्थळी पोहोचून मदतकार्याला हातभार लावला.

जखमींना मंचर उपजिल्हा रुग्णालय आणि घोडेगाव ग्रामीण रुग्णालयात प्राथमिक उपचार देण्यात आले. त्यानंतर काही जखमींना पुढील उपचारांसाठी पुण्यातील रुग्णालयात, तर काहींना मंचर येथील खासगी रुग्णालयात हलविण्यात आले.