Chief Minister’s post : राज्यातील मुख्यमंत्रीपदावरून महायुतीतील राजकीय चर्चा पुन्हा रंगत आहेत. परिवहन मंत्री प्रताप सरनाईक यांनी शिवसेना नेते एकनाथ शिंदे यांनी पुन्हा महाराष्ट्राचे मुख्यमंत्री व्हावे, अशी इच्छा व्यक्त केली आहे. स्वातंत्र्यदिनाच्या दिवशी सरनाईक यांनी केलेल्या या वक्तव्यामुळे राजकीय वर्तुळात चर्चांना उधाण आले आहे.

काही दिवसांपूर्वी खासदार प्रतापराव जाधव यांनीही एकनाथ शिंदे यांनी पुन्हा मुख्यमंत्री व्हावे, अशी इच्छा व्यक्त केली होती. सरनाईक यांनी जाधव यांच्या भूमिकेला पाठिंबा दिला आहे. मात्र, सध्याच्या परिस्थितीत भाजपकडे संख्याबळ अधिक असल्याने मुख्यमंत्रीपद भाजपकडे असल्याचेही त्यांनी स्पष्ट केले.

‘शिवसैनिक म्हणून शिंदे मुख्यमंत्री व्हावेत, ही प्रामाणिक इच्छा’

प्रताप सरनाईक म्हणाले, “प्रतापराव जाधव असू द्या किंवा प्रताप सरनाईक असू द्या, एकनाथ शिंदे मुख्यमंत्री व्हावेत ही शिवसैनिक म्हणून आमची प्रामाणिक इच्छा आहे. मात्र, मुख्यमंत्रीपद ठरवताना संख्याबळाला महत्त्व असते. भाजप, राष्ट्रवादी आणि शिवसेना अशी महायुती राज्यात सत्तेत आहे. भाजपकडे संख्याबळ जास्त असल्याने त्यांचा मुख्यमंत्री आहे.”

‘आमदार-खासदार जास्त आले तर मुख्यमंत्रीपदावर दावा’

भविष्यात विधानसभेच्या आणि लोकसभेच्या निवडणुकांमध्ये शिवसेनेचे अधिक आमदार आणि खासदार निवडून आले, तर पक्ष मुख्यमंत्रीपदावर दावा करेल, असे सरनाईक यांनी स्पष्ट केले. “पक्षाचा कार्यकर्ता म्हणून माझ्या पक्षाचा नेता मुख्यमंत्री व्हावा, ही सर्वांचीच इच्छा असते,” असेही त्यांनी म्हटले.

दरम्यान, सरनाईक यांच्या या वक्तव्यामुळे महायुतीतील मुख्यमंत्रीपदाचा मुद्दा पुन्हा चर्चेत आला आहे. त्यांच्या वक्तव्यावर भाजपकडून काय प्रतिक्रिया येते, याकडे आता राजकीय वर्तुळाचे लक्ष लागले आहे.