Egypt Submarine : इजिप्तमधील हुरघाडा शहराजवळील लाल समुद्रात एक पर्यटक पाणबुडी बुडाल्याने मोठी दुर्घटना घडली. या घटनेत किमान सहा जणांचा मृत्यू झाल्याची भीती व्यक्त केली जात आहे, तर १४ जण जखमी झाले आहेत, त्यापैकी चार जणांची प्रकृती गंभीर असल्याचे सांगितले जात आहे.

अपघाताच्या वेळी सिंदबाद नावाच्या या पाणबुडीत सुमारे ४४ लोक होते, असे सांगण्यात येत आहे. त्याच वेळी, रशियन सरकारी वृत्तसंस्थेने म्हटले आहे की इजिप्तमध्ये बुडालेल्या पर्यटक पाणबुडीतून ३८ रशियन लोकांना वाचवण्यात आले आहे.

मिळालेल्या माहितीनुसार, जखमींच्या प्रकृतीचे गांभीर्य लक्षात घेऊन त्यांना घेऊन जाण्यासाठी २१ रुग्णवाहिका घटनास्थळी पाठवण्यात आल्या. सर्वजण इजिप्तमधील प्रवाळ खडक आणि उष्णकटिबंधीय मासे शोधण्यासाठी निघाले होते, पण त्यापूर्वीच जहाजाला अपघात झाला.

ही पाणबुडी ७२ फूट खोलीपर्यंत डुबकी मारू शकते. मात्र काही कारणास्तव ते त्यापूर्वीच बुडाले. पाणबुडी बुडण्याचे कारण शोधले जात आहे. सिंदबाद पाणबुडी अनेक वर्षांपासून कार्यरत होती, ज्यामुळे पर्यटकांना समुद्राखाली २५ मीटर (८२ फूट) खोलवर जाऊन ५०० मीटर उंचीच्या कोरल रीफ आणि त्यातील सागरी जीवनाचा शोध घेण्याची संधी मिळत असे. फिनलंडमध्ये डिझाइन केलेली ही पाणबुडी ४४ प्रवासी आणि दोन क्रू मेंबर्सना वाहून नेऊ शकते.

‘सर्व प्रवासी रशियाचे होते’
दरम्यान, रशियन दूतावासाने फेसबुकवरील एका निवेदनात सांगितले की हे जहाज नियमित पाण्याखालील सहलीवर होते आणि त्यात अल्पवयीन मुलांसह ४५ रशियन पर्यटक होते. बहुतेक प्रवाशांना वाचवण्यात आले आणि त्यांना हॉटेल आणि रुग्णालयात नेण्यात आले, परंतु कोणत्याही गंभीर आरोग्य समस्या आढळल्या नाहीत. सध्या रशियन अधिकारी देखील घटनास्थळी दाखल झाले आहेत.

याआधी तीन जणांचा मृत्यू झाला होता
इजिप्तमध्ये पर्यटक बोटींशी संबंधित ही पहिलीच घटना नाही. गेल्या वर्षी नोव्हेंबरमध्येही इजिप्तमधील मार्सा आलमजवळ लाल समुद्रात ४४ प्रवाशांना घेऊन जाणारी एक पर्यटक बोट बुडाली होती. मोठ्या लाटेला धडकल्यानंतर बोट उलटल्याचे तपासात समोर आले.

त्यावेळी गव्हर्नर अमर हनाफी यांनी सांगितलं होत की त्यावेळी २८ प्रवाशांना वाचवण्यात आले होते, त्यापैकी काही गंभीर जखमींना उपचारासाठी विमानाने हलवण्यात आले होते. मात्र, नंतर घटनास्थळावरून तीन मृतदेह सापडले.