राजगुरुनगर : खेड तालुक्यात उद्या शनिवारी भाद्रपदी बैलपोळ्याचा सण साजरा होत आहे. त्यानंतर रविवार, दि. ११ ऑक्टोबरपासून शारदीय नवरात्रोत्सवाला सुरुवात होणार आहे. दोन्ही सणांच्या पार्श्वभूमीवर बाजारपेठांमध्ये लगबग सुरू झाली असली, तरी यंदा दुष्काळी परिस्थिती आणि महागाईच्या झळा सणांच्या उत्साहावरही जाणवत आहेत. पिकांच्या नुकसानीची चिंता, दुष्काळी मदतीसाठी कागदपत्रांची जुळवाजुळव आणि पंचनाम्यांच्या प्रक्रियेत शेतकरी गुंतल्याने बैलपोळ्याच्या तयारीवर काहीसा परिणाम झाला आहे.

बैलपोळ्यानिमित्त राजगुरुनगरच्या बाजारपेठेत विविध आकारांतील आकर्षक, रंगीबेरंगी बैलजोड्या आणि घोडे विक्रीसाठी दाखल झाले आहेत. बैलांना सजविण्यासाठी लागणारे दोरखंड, रंग, सोनेरी सजावटीचे साहित्य, झुल आदी वस्तूंची दुकानेही सजली आहेत. मात्र, दुष्काळी परिस्थिती आणि वाढत्या महागाईमुळे खरेदी-विक्रीवर परिणाम झाल्याचे चित्र दिसत आहे. बैलपोळ्यासाठी बाजारात येणाऱ्या नागरिकांच्या खरेदीवरही आर्थिक परिस्थितीचे सावट जाणवत आहे.

दरम्यान, नवरात्रोत्सवाच्या स्वागतासाठी घराघरांत महिलांची साफसफाई आणि तयारीची लगबग सुरू झाली आहे. घटस्थापनेसाठी लागणारे धान्य, मातीचे घट, झेंडूची फुले, पूजासाहित्य तसेच दांडियाचे साहित्य बाजारात विक्रीसाठी उपलब्ध झाले आहे. बैलपोळा आणि नवरात्रोत्सव असे सलग सण असल्याने बाजारपेठेत उत्साहाचे वातावरण असले, तरी दुष्काळाच्या पार्श्वभूमीवर खर्चाचे गणित जुळवताना नागरिकांना काटकसर करावी लागत आहे.

यंदाच्या दुष्काळी परिस्थितीची जाणीव ठेवून काही मंडळांनी महिला आणि मुलींसाठी साधे कार्यक्रम आयोजित करत खर्चात काटकसर करण्यावर भर दिला आहे. त्यामुळे एका बाजूला सण-उत्सवांचा उत्साह आणि दुसऱ्या बाजूला दुष्काळामुळे निर्माण झालेली आर्थिक चिंता, असे संमिश्र चित्र खेड तालुक्यात पाहायला मिळत आहे.

कनेरसर येथे उत्सवाची तयार

खेड तालुक्यातील श्रीक्षेत्र कनेरसर येथील यमाई देवी आणि राजगुरुनगर शहरालगत पुणे-नाशिक महामार्गावरील तुकाईमाता देवीच्या उत्सवानिमित्त विविध धार्मिक विधी आणि कार्यक्रमांचे आयोजन करण्यात आले आहे. तालुक्यातील गावोगावी तसेच राजगुरुनगर शहरातील नवरात्रोत्सव मंडळांनीही उत्सवाची तयारी केली आहे. सांस्कृतिक कार्यक्रम, व्याख्याने, कीर्तने, प्रवचने, भजनांचे कार्यक्रम तसेच महिलांसाठी पैठणीसह विविध वस्तूंच्या बक्षिसांच्या स्पर्धांचे आयोजन करण्यात येत आहे.