Sugar Price Drop – केंद्र सरकारने परदेशातून तयार साखर आयात करण्यास परवानगी दिल्याने साखर, गुळाचा गोडवा वाढला आहे. साखरेच्या दरात आठवड्यात घाऊक बाजारात किलोमागे १५ रुपयांनी तर गुळाच्या दरात ७ ते ८ रुपयांनी घसरण झाली आहे. त्यामुळे श्रावणातील पहिल्या १५ दिवसांत साखरेसाठी जादा पैसे मोजणाऱ्या सामान्यांना दिलासा मिळाला आहे. श्रावणासह बाप्पाच्या आगमनावेळी साखर, गुळ स्वस्त असणार आहे.

जून महिन्यापासून साखरेची दरवाढ सुरू होती. श्रावण महिन्यातील सण, उत्सवामुळे घरगुती ग्राहकांसह प्रक्रिया उद्योगांकडून साखरेला मागणी वाढली. त्यातच गेल्या हंगामात कमी झालेले उत्पादन, पाऊस लांबल्याने विलंबाने सुरू होणाऱ्या उत्पादनामुळे साखरेचे दर वाढत होते. साखरेपाठोपाठ गुळही महागाला होता. आता गणेशोत्सव, नवरात्रौत्सव, दिवाळी हा सणासुदीचा काळ असल्याने साखर, गुळाला मागणी वाढणार आहे.

यामुळे १० लाख टन साखरेच्या कच्च्या मालाची आवक करण्यास केंद्र सरकारने परवानगी दिली. कच्चा माल आल्यानंतर त्यापासून साखर बनविण्यास दीड ते २ महिन्यांचा कालावधी लागतो. यामुळे केंद्राने थेट तयार साखर आयात करण्याचा निर्णय घेतला. मार्केट यार्डात सध्या साखरेची दररोज १०० ते १५० टन, तर गुळाची ७० ते ८० टन आवक होते.

“केंद्र सरकारच्या धोरणामुळे आठवडाभरात साखरेच्या भावात घसरण झाली आहे. आता पुरेसा साखर साठा आहे. दरवाढीने घरगुती ग्राहकांनीही साखर खरेदी केल्याने येत्या काळात भावात वाढण्याची शक्यता नाही.”
– मुकेश गोयल, साखरेचे व्यापारी, मार्केट यार्ड

“साखरेच्या भावातील घट आणि रक्षाबंधनाची खरेदी संपल्यामुळे गुळाच्या भावातही घट झाली आहे. सणाच्या काळात गुळाला मागणी असणारच. साखरेचे भाव स्थिर झाल्यास गुळही जैसे थे राहिल.”
– जवाहरलाल बोथरा, गुळाचे व्यापारी, मार्केट यार्ड