Stock Market : अमेरिकन बाँड बाजारातील नरमाई, आशियाई बाजारांमधील सकारात्मक वातावरण आणि खालच्या पातळीवर झालेली खरेदी यामुळे गुरुवारी (20 ऑगस्ट) भारतीय शेअर बाजारात चांगली तेजी पाहायला मिळाली.

सेन्सेक्सने चार दिवसांच्या घसरणीनंतर तर निफ्टीने सलग सात दिवसांच्या घसरणीनंतर हिरव्या चिन्हात व्यवहार बंद केला. या तेजीमुळे बीएसईवरील सूचीबद्ध कंपन्यांचे एकूण बाजार भांडवल 1.42 लाख कोटी रुपयांनी वाढले.

आज सेन्सेक्स 628.04 अंक म्हणजेच 0.82 टक्क्यांनी वाढून 77,537.72 अंकांवर बंद झाला. निफ्टीमध्ये 153.55 अंकांची म्हणजेच 0.64 टक्क्यांची वाढ झाली आणि तो 24,231.85 अंकांवर स्थिरावला.

दिवसभराच्या व्यवहारात सेन्सेक्सने 701.43 अंकांची झेप घेत 77,611.11 अंकांची पातळी गाठली. निफ्टीही 186.85 अंकांनी वाढून 24,265.15 अंकांपर्यंत पोहोचला होता.

गुंतवणूकदारांच्या संपत्तीत 1.42 लाख कोटींची वाढ –

19 ऑगस्ट रोजी बीएसईवर सूचीबद्ध सर्व कंपन्यांचे एकूण बाजार भांडवल 4,90,05,869.88 कोटी रुपये होते. गुरुवारी ते वाढून 4,91,48,329.64 कोटी रुपये झाले. त्यामुळे एका दिवसात गुंतवणूकदारांच्या संपत्तीत 1,42,459.76 कोटी रुपयांची वाढ झाली.

सेन्सेक्समधील केवळ 4 शेअर्स घसरणीत –

सेन्सेक्समधील 30 पैकी बहुतांश शेअर्समध्ये तेजी राहिली. एटर्नल (झोमॅटो), कोटक महिंद्रा बँक आणि आयटीसी यांच्या शेअर्समध्ये प्रमुख वाढ दिसून आली. दुसरीकडे टाटा स्टील, इंडिगो, एचसीएल टेक आणि टायटन हे चार शेअर्स घसरणीसह बंद झाले.

मिडकॅप-स्मॉलकॅपमध्येही तेजी –

ब्रॉडर मार्केटमध्येही सकारात्मक वातावरण राहिले. निफ्टी मिडकॅप 100 निर्देशांक 0.41 टक्क्यांनी, तर निफ्टी स्मॉलकॅप 100 निर्देशांक 0.64 टक्क्यांनी वाढला. क्षेत्रीय निर्देशांकांमध्ये आयटी, खासगी बँका आणि एफएमसीजी क्षेत्राला बाजाराला चांगला आधार मिळाला. या क्षेत्रांतील निफ्टी निर्देशांकांमध्ये अर्ध्या टक्क्यापेक्षा अधिक वाढ झाली.

176 शेअर्स वर्षभरातील उच्चांकावर –

बीएसईवर गुरुवारी एकूण 4,549 शेअर्समध्ये व्यवहार झाले. त्यापैकी 2,450 शेअर्स वधारले, तर 1,874 शेअर्स घसरले. 225 शेअर्सच्या किमतीत कोणताही बदल झाला नाही.

दरम्यान, 176 शेअर्सनी वर्षभरातील उच्चांक, तर 92 शेअर्सनी वर्षभरातील नीचांकी पातळी गाठली. 10 शेअर्स अपर सर्किटवर, तर 42 शेअर्स लोअर सर्किटवर बंद झाले.