चहा म्हटले की अनेकांना स्वर्गातील अमृतच वाटते. इतके काही लोक चहासाठी वेडे झालेले असतात. मग हे लोक केव्हाही, कोणत्याही वेळेला, कुठेही चहा पिणे टाळत नाहीत. यातीलच काहीजणांना जेवल्यानंतर चहा पिण्याची सवय असते. पण ही सवय आरोग्याला घातक ठरते.

अनेकांच्या दिवसाची सुरुवात वाफाळल्या चहाने होते. एक चहा दिवसभराचा थकवा दूर करतो. तर ताजेतवाने राहण्यासाठी चहा प्यायला जातो. काही जणांना दिवसातून कितीही वेळा आणि कोणत्याही वेळी चहा पिण्याची सवय असते. जेवल्यानंतर चहा पिणं बऱ्याच जणांना आवडतं. पण ही सवय प्रकृतीला घातक ठरू शकते. जेवणानंतर तातडीने चहा पिणं आरोग्यासाठी अजिबात चांगले नाही.

चहापावडरमध्ये आम्ल पदार्थ असतात. हे पदार्थ अन्नातील प्रोटीनमध्ये मिसळतात. यामुळे प्रोटीन टणक बनतात, परिणामी ते पचायला जड जातं. यामुळे जेवल्यानंतर तातडीने चहा पिणं टाळावं. याशिवाय चहामध्ये कॅफिनही असतं. ज्यामुळे रक्‍तदाब वाढतो. त्याचसोबत कॅफिनचं अतिप्रमाण शरीरात कोर्टिसोल वाढवतं. यामुळे शरीराला अनेक आजारांचा सामना करावा लागतो.

हृदयासंबंधित आजार, मधुमेह आणि वजन वाढणं इत्यादींचा समावेश आहे. चहामध्ये पॉलिफेनॉल्स आणि टेनिन इत्यादी घटक असतात जे जेवणातील लोह शोषत नाहीत. परिणामी शरीराला त्याचा फायदा होत नाही. विशेषत: महिलांमध्ये लोहाची कमतरता असते, त्यांच्यासाठी जेवल्यानंतर चहा पिणं नुकसानकारक ठरतं. जर तुम्ही चहा किंवा कॉफी प्यायल्याशिवाय राहू शकत नसाल, तर जेवणानंतर किमान एक तासाने घ्यावेत.