Donald Trump On Iran: अमेरिकेचे राष्ट्राध्यक्ष डोनाल्ड ट्रम्प यांनी पुन्हा एकदा इराणबाबत आक्रमक भूमिका मांडत खळबळजनक विधान केले आहे. अमेरिकेची इच्छा झाली तर इराणच्या उर्वरित सर्वोच्च नेतृत्वाचा केवळ एका हल्ल्यात अंत करू शकतो, असा दावा ट्रम्प यांनी केला.

मात्र, इराणशी संवाद आणि संभाव्य चर्चेचा मार्ग खुला ठेवण्याची अमेरिकेची भूमिका असल्यामुळे असे पाऊल उचलले जाणार नसल्याचेही त्यांनी स्पष्ट केले.

‘एका फटक्यात सगळ्यांचा नाश करू शकतो’
अमेरिकन वृत्तसंस्था Axios ला दिलेल्या मुलाखतीत ट्रम्प म्हणाले की, इराणचे अनेक वरिष्ठ नेते सध्या माजी सर्वोच्च नेते अयातुल्ला अली खामेनी यांच्या अंत्यविधीसाठी एकत्र जमले आहेत.

याचा उल्लेख करत त्यांनी म्हटले,”ते सर्वजण एका ठिकाणी उपस्थित आहेत. आम्ही इच्छिल्यास एका हल्ल्यात त्यांचा पूर्ण नायनाट करू शकतो. मात्र आम्ही तसे करणार नाही, कारण त्यानंतर चर्चा करण्यासाठी कोणीच उरणार नाही.” या विधानामुळे मध्यपूर्वेतील तणाव पुन्हा एकदा चर्चेत आला आहे.

दबाव आणि चर्चा दोन्हींचा संदेश Donald Trump On Iran:

ट्रम्प यांच्या वक्तव्यातून इराणवर लष्करी दबाव कायम ठेवण्याचा प्रयत्न दिसून येतो. त्याचवेळी, अमेरिकेला इराणसोबत चर्चेचा पर्यायही खुला ठेवायचा असल्याचे त्यांनी सूचित केले. त्यामुळे ‘दबाव आणि संवाद’ या दुहेरी धोरणाचा अवलंब अमेरिका करत असल्याचे मानले जात आहे.

अमेरिका-इराण संबंध कायम तणावपूर्ण

गेल्या काही वर्षांपासून अमेरिका आणि इराण यांच्यातील संबंध अत्यंत तणावपूर्ण राहिले आहेत. अणुकार्यक्रम, आर्थिक निर्बंध, प्रादेशिक संघर्ष तसेच मध्यपूर्वेतील अमेरिकन हितसंबंध या मुद्द्यांवर दोन्ही देशांमध्ये सातत्याने संघर्षाची परिस्थिती निर्माण होत आली आहे. ट्रम्प यांच्या नव्या विधानामुळे या तणावात आणखी भर पडण्याची शक्यता व्यक्त केली जात आहे.

इराणची भूमिका काय? Donald Trump On Iran:

ट्रम्प यांच्या या वक्तव्यावर इराणकडून अधिकृत प्रतिक्रिया अद्याप आलेली नाही. मात्र, अशा प्रकारच्या वक्तव्यांमुळे दोन्ही देशांमधील राजनैतिक संबंधांवर परिणाम होण्याची शक्यता व्यक्त केली जात आहे. आंतरराष्ट्रीय समुदायाचेही या घडामोडींवर लक्ष असून, पुढील काही दिवसांत अमेरिका आणि इराण यांच्यातील घडामोडी महत्त्वाच्या ठरणार आहेत.