Donald Trump Health Update। अमेरिकेचे राष्ट्राध्यक्ष डोनाल्ड ट्रम्प हे नेहमीच कोणत्या ना कोणत्या कारणाने सतत चर्चेत येत असतात. पण यावेळी ट्रम्प हे त्यांच्या तब्येतीमुळे चर्चेत आले आहेत. डोनाल्ड ट्रम्प यांच्या प्रकृतीबद्दलच्या चर्चा पुन्हा वेगाने सुरू झाल्या आहेत. 79 वर्षांचे ट्रम्प हे अमेरिकेचे अध्यक्षपद भूषवणारे दुसरे सर्वात वयस्कर व्यक्ती आहेत. दरम्यान, ट्रम्प यांच्या हातावर अलीकडेच निळसर जखमा आढळून आल्या आहेत. या चर्चांना उधाण आलं, मात्र आता ट्रम्प यांनी स्वत:आपल्या प्रकृतीबद्दल माहिती दिली आहे. “आपण एकदम फिट” असल्याचे ट्रम्प यांनी सांगितले आहे. त्यांच्या हातावर दिसणारे निळे डाग (जखम) हे कोणत्याही पडण्यामुळे किंवा आरोग्य समस्येमुळे नाहीत, तर दररोज घेत असलेल्या ॲस्पिरिन औषधामुळे झालं आहे, असे डोनाल्ड ट्रम्प यांनी स्पष्ट केले आहे. एका जाहीर सभेत ट्रम्प झोपी गेल्याचा दावाही करण्यात आला होता. मात्र ट्रम्प यांनी आता ते देखील नाकारलं आहे. तब्येतीबद्दल काय म्हणाले ट्रम्प ? Donald Trump Health Update। सध्या 79 वर्षांचे असलेले ट्रम्प हे अमेरिकेचे दुसरे सर्वात वयस्कर अध्यक्ष आहेत. माझी तब्येत पूर्णपणे ठीक आहे असं त्यांनी द वॉल स्ट्रीट जर्नलला दिलेल्या मुलाखतीत सांगितलं. तसेच आपल्या तब्येतीबद्दल सतत होणाऱ्या चर्चांबद्दलही त्यांनी नाराजी व्यक्त केली. त्याच्या हातांवर असलेले निळे डाग (जे कधीकधी मेकअपने झाकलेले दिसतात) तसेच त्यांचे सुजलेले घोटे याबद्दल अलिकडच्या आठवड्यात, मीडिया रिपोर्ट्समधून अनेक प्रश्न उपस्थित करण्यात आले होते. त्यावर ट्रम्प यांनी स्पष्ट प्रतिक्रिया दिली. रक्त पातळ करण्यासाठी ते दररोज ॲस्पिरिन घेतात, त्यामुळे असे निशाण दिसतात, अशी प्रतिक्रिया ट्रम्प यांनी दिली. कशामुळे होतात जखमा ? आपल्या प्रकृतीबद्दल काही प्रश्न वारंवार विचारले जातात, त्याबद्दल ट्रम्प स्पष्टपणे बोलले. चला तब्येतीबद्दल 25 व्यांदा बोलूया, असं उपरोधिकपणे ते म्हणाले. आपल्या प्रकृतीत कोणत्याही प्रकारची बिघाड झाल्याचे ट्रम्प यांनी नाकारलं आणि राष्ट्रपती म्हणून आपली जबाबदारी पार पाडण्यासाठी मी पूर्णपणे तंदुरुस्त आहे, असेही त्यांनी सांगितले. ” ॲस्पिरिन ( हे औषध) रक्त पातळ करण्यासाठी चांगले आहे आणि मला माझ्या हृदयातून घट्ट रक्त वाहू द्यायचं नाहीये.. मला माझ्या हृदयातून चांगले, पातळ रक्त वहायला हवं आहे,” असे ट्रम्प म्हणाले. जेव्हा माझ्या हाताला दुखापत होते तेव्हा त्यावर मेकअप किंवा पट्टी लावतो असेही रिपब्लिकन अध्यक्ष म्हणाले. त्यांच्या हातांवरील निळ्या डागांबद्दल ते मोकळेपणाने बोलले. हाय-फाइव्ह देत असताना त्यांचे ॲटर्नी जनरल पाम बोंडी यांची अंगठी त्यांच्या हाताच्या मागच्या बाजूला लागली तेव्हा हे घडल्याचे त्यांनी सांगितले. भरसभेत लागली झोप ? Donald Trump Health Update। ट्रम्प यांना सार्वजनिक मंचावर डोळे उघडं ठेवणं मुश्किल झाल्याचे बऱ्याचदा दिसून आले आहे, त्यामध्ये ओव्हल ऑफीसच्या मीटिंगचाही समावेश होते. मात्र ट्रम्प यांनी हे दावेही फेटाळून लावले. मला कधीच जास्त झोप येत नाही, असं ते म्हणाले. मी जेव्हा झोपेत आढळलो, ते माझ्या विश्रांतीचे क्षण होतं असं म्हणत त्यांनी झोप लागल्याचे दावे फेटाळाले. “मी फक्त माझे डोळे बंद करतो. ते मला खूप आरामदायी वाटतं ” असंही त्यांनी सांगितलं. ट्रम्प यांच्याबद्दलच्या या बातम्या अशा वेळी आल्या आहेत आणि तेव्हाच त्यांना त्यांच्या भूतकाळातील विधानांची आठवण करून दिली जात आहे. तेव्हा त्यांनी माजी राष्ट्राध्यक्ष जो बायडेन यांना “स्लीपी” म्हणून त्यांची वारंवार खिल्ली उडवली होती.
