Donald Trump : अमेरिकेच्या राजकारणात सध्या मोठी उलथापालथ सुरू आहे. राष्ट्राध्यक्ष डोनाल्ड ट्रम्प यांच्या रिपब्लिकन पक्षाला मध्यावधी निवडणुकांमध्ये मोठा राजकीय धक्का बसला असून, डेमोक्रॅटिक पक्षाने प्रतिनिधीगृह आणि सिनेट या दोन्ही सभागृहांवर नियंत्रण मिळवले आहे. या निकालानंतर ट्रम्प यांनी सोशल मीडियावर नाराजी व्यक्त करत अमेरिकेने इतिहासात मोठे पाऊल मागे टाकल्याची टीका केली.

एवढेच नव्हे, तर त्यांच्या कार्यकाळात वेगाने वाढणाऱ्या शेअर बाजाराचे निवडणुकीच्या निकालानंतर एका दिवसात तीन ट्रिलियन डॉलरचे नुकसान झाल्याचा दावाही त्यांनी केला. दरम्यान, पत्रकारांच्या एका अनपेक्षित प्रश्नाने ट्रम्प यांची चांगलीच चर्चा रंगली आहे. ‘पराभूत झाल्यासारखे कसे वाटते?’ असा थेट सवाल पत्रकाराने करताच ट्रम्प यांनी उत्तर न देता तेथून काढता पाय घेतला. या घटनेचा व्हिडीओ सोशल मीडियावर व्हायरल होत आहे.

पत्रकाराचा थेट सवाल अन् ट्रम्प यांनी फिरवली पाठ!

अमेरिकेच्या मध्यावधी निवडणुकांमध्ये रिपब्लिकन पक्षाला मोठा फटका बसल्यानंतर पत्रकारांनी ट्रम्प यांना विविध प्रश्न विचारले. व्हाईट हाऊसबाहेर पत्रकारांशी संवाद साधत असताना त्यांना चीफ ऑफ स्टाफ सूसी वाईल्स यांच्या पदाबाबत आणि आगामी फेरबदलांबाबत प्रश्न विचारण्यात आले.

याचवेळी स्काय न्यूजचे पत्रकार डॉमिनिक वाघॉर्न यांनी ट्रम्प यांना, ‘मिस्टर प्रेसिडेंट, पराभूत झाल्यासारखे कसे वाटते?’ असा सवाल केला. मात्र, या प्रश्नाचे उत्तर देण्याऐवजी ट्रम्प यांनी पत्रकारांकडे दुर्लक्ष करत पुढे जाणे पसंत केले. ते थेट आपल्या हेलिकॉप्टरच्या दिशेने निघून गेले. या प्रसंगाचा व्हिडीओ समोर आल्यानंतर सोशल मीडियावर त्याची चर्चा सुरू झाली आहे.

सूसी वाईल्स यांची एक्झिट, स्टीफन मिलर यांच्याकडे मोठी जबाबदारी!

निवडणुकीतील निकालानंतर ट्रम्प प्रशासनातील महत्त्वाचा बदल म्हणजे व्हाईट हाऊसच्या चीफ ऑफ स्टाफ पदावरील फेरबदल. ट्रम्प यांनी ६ नोव्हेंबर रोजी सूसी वाईल्स यांच्या जागी स्टीफन मिलर यांची नियुक्ती जाहीर केली. ९ नोव्हेंबरपासून मिलर या पदाची जबाबदारी स्वीकारणार आहेत.

या निर्णयाबाबत पत्रकारांनी विचारले असता ट्रम्प म्हणाले की, त्यांना बदल हवा होता. कधीकधी आयुष्यात बदल करावे लागतात आणि काही महत्त्वाची पावले उचलावी लागतात, असे त्यांनी स्पष्ट केले. सूसी वाईल्स यांनी ट्रम्प प्रशासनात महत्त्वाची भूमिका बजावली होती. आता त्या ट्रम्प यांच्या राजकीय संघटनेत काम करणार आहेत.

विशेष म्हणजे, स्टीफन मिलर हे ट्रम्प यांचे विश्वासू सहकारी असून, प्रशासनाच्या कठोर स्थलांतरविषयक धोरणांच्या आखणीत त्यांची महत्त्वाची भूमिका राहिली आहे. त्यामुळे त्यांच्या नियुक्तीकडे केवळ प्रशासकीय बदल म्हणून नव्हे, तर आगामी काळातील ट्रम्प यांच्या राजकीय आणि धोरणात्मक भूमिकेच्या दृष्टीनेही पाहिले जात आहे.

इराणबाबत ट्रम्प यांचा मोठा दावा; अमेरिकेने युद्ध जिंकल्याचे वक्तव्य

पत्रकारांशी संवाद साधताना ट्रम्प यांनी इराणसोबतच्या संघर्षावरही भाष्य केले. अमेरिकेने इराणला पराभूत केले असून, दोन्ही देशांमध्ये चर्चा सुरू असल्याचा दावा त्यांनी केला. इराणसोबतचे संबंध आता चांगल्या स्थितीत असल्याचेही ते म्हणाले.

यावेळी ट्रम्प यांनी गेल्या सहा ते सात महिन्यांत अमेरिकेचा एकही सैनिक शहीद झाला नसल्याचा दावा केला. मात्र, त्यांच्या या वक्तव्यावर प्रश्न उपस्थित होत आहेत. कारण अमेरिकेच्या संरक्षण विभागाच्या आकडेवारीनुसार, २९ ऑक्टोबरपर्यंत इराणविरोधातील लष्करी मोहिमांशी संबंधित २३ अमेरिकन सैनिकांचा मृत्यू झाला होता. यामध्ये शत्रूच्या हल्ल्यात मृत्यू झालेल्या सैनिकांसह बिगर-लढाऊ घटनांमधील मृत्यूंचाही समावेश आहे.

जुलै महिन्यात इराणसोबतच्या संघर्षात मृत्युमुखी पडलेल्या चार अमेरिकन सैनिकांच्या पार्थिवावर अंत्यसंस्कार करण्यात आले होते. त्यामुळे सैनिकांच्या मृत्यूबाबत ट्रम्प यांनी केलेल्या वक्तव्याची आणि उपलब्ध अधिकृत आकडेवारीची तुलना केली जात आहे.