Phaltan Doctor Case : फलटण उपजिल्हा रुग्णालयातील डॉक्टर युवतीच्या आत्महत्या प्रकरणी मुख्य संशयित आरोपी पीएसआय गोपाल बदने हा काल शनिवार दि. 25 रोजी तो स्वतःहून फलटण ग्रामीण पोलीस ठाण्यात जाऊन हजर झाला. त्यानंतर रविवार दि. 26 रोजी सायंकाळी न्यायालयात हजर केले असता त्याला चार दिवसांची पोलीस कोठडी सुनावण्यात आली असून त्यांची चौकशी सुरू आहे.

या प्रकरणाचा पोलिसांकडून कसून तपास सुरू आहे. आज राज्य महिला आयोगाच्या अध्यक्षा रुपाली चाकणकर यांनी फलटणमध्ये जाऊन जिल्हा रुग्णालयाला भेट दिली आणि पत्रकार परिषद घेत या प्रकरणी अनेक धक्कादायक खुलासे केले आहेत. त्यांनी आरोपी आणि आत्महत्या केलेल्या महिला डॉक्टर यांच्यातील संपर्काविषयी सांगितले.

रुपाली चाकणकरांनी केले अनेक धक्कादायक खुलासे

रुपाली चाकणकर म्हणाल्या, ‘जानेवारी ते मार्चदरम्यान डॉक्टर आणि पोलिस उपनिरीक्षक गोपाल बदने हे संपर्कात होते आणि त्यांचे अनेकदा बोलणं झालं होतं. त्यानंतर डॉक्टर आरोपी प्रशांत बनकरच्या संपर्कात होती. तसेच पोलिसांनी सीडीआर काढला आहे.

त्यामुळे सुसाईड नोटमध्ये गोपाल बदने, प्रशांत बनकर यांची नावं होती. जानेवारी ते मार्चदरम्यान गोपाल बदनेसोबत डॉक्टर संपर्कात होती. त्यानंतर डॉक्टर आणि बदनेचा काही संवाद झाला नाही. त्यानंतर प्रशांत बनकरसोबत डॉक्टराचा संवाद झाल्याचा रेकॉर्ड आहे.’

पुढे बोलताना म्हणाल्या की, ‘डॉक्टरने सुसाईड नोटमध्ये लिहिले होते की चार वेळा बलात्कार केला. त्यानुसार गोपाल बदने आणि डॉक्टर या दोघांचे लोकेशन कुठे एकत्र होतं का? हे सीडीआरच्या माध्यमातून काढण्याचा प्रयत्न केला जात आहे. सीडीआर आणि फॉरेन्सिकच्या अहवालातून लोकेशन शोधलं जाणार आहे.

पोलिसांकडून गोपाल बदनेचा जबाब नोंदवला जात आहे. पोलिसांकडून डॉक्टर, बदने आणि बनकर या तिघांचाही सीडीआर काढला जात आहे. तर इतरांचा सीडीआर गरजेचा पडला तर तो काढला जाईल’, असं रुपाली चाकणकरांनी सांगितले.

या प्रकरणाचे सर्व अपडेट महिला आयोगाकडून रोज घेतले जात आहेत. आम्ही याबाबत आवश्यक सूचना देत आहोत. सीडीआर, फॉरेन्सिक अहवाल अशीच कारवाई केली जाईल. या प्रकरणाचा तपास एसपी, डीव्हायएसपी, सायबर सर्व एकत्रितपणे करत आहेत, असं रुपाली चाकणकर यांनी सांगितले.