सातारा: साताऱ्यातील फलटण येथील उपजिल्हा रुग्णालयातील एका तरुण महिला डॉक्टरच्या आत्महत्येने संपूर्ण महाराष्ट्रात खळबळ उडाली आहे. आत्महत्येपूर्वी डॉक्टरने आपल्या तळहातावर आत्महत्येमागील कारण नमूद केले होते. या गंभीर प्रकरणात फलटण ग्रामीण पोलीस ठाण्यात कार्यरत पोलीस उपनिरीक्षकासह दोघांवर गुन्हा दाखल करण्यात आला असून एका आरोपीला पोलिसांनी अटक केली आहे.

या घटनेनंतर राज्यभरात संतापाची लाट उसळली असून विरोधकांनी सत्ताधारी पक्षावर टीकेची झोड उठवली आहे. या पार्श्वभूमीवर राज्याचे मुख्यमंत्री देवेंद्र फडणवीस यांनी प्रतिक्रिया दिली आहे.

माध्यमांशी बोलताना देवेंद्र फडणवीस म्हणाले की, “खूपच गंभीर प्रकरण आहे. एक तरुण डॉक्टर स्वत:च्या हातावर आपल्या मनातील वेदना लिहून आत्महत्या करते ही आमच्यासाठी एक दुःखद गोष्ट आहे.” सरकारने कालच संबंधित पोलीस अधिकाऱ्याला निलंबित केले असून अटक करण्याचे काम सुरू आहे. “कोणालाही सोडलं जाणार नाही. जे कोणी सहभागी असतील त्यांना कठोर शिक्षा दिली जाईल,” असे आश्वासन फडणवीस यांनी दिले.

राजकारण करणे असंवेदनशील: मुख्यमंत्र्यांची विरोधकांवर टीका –
या संवेदनशील विषयाचे राजकारण करण्यावरून फडणवीस यांनी विरोधकांवरही निशाणा साधला. “मला वाटतं की या प्रकरणात विरोधक जे राजकारण करण्याचा प्रयत्न करत आहेत, तेही खूप चुकीचे आहे. इतक्या संवेदनशील प्रकरणातही राजकीय पोळी भाजण्याचे काम करणे ही असंवेदनशीलता आहे,” असे राज्याचे गृहमंत्री असलेल्या देवेंद्र फडणवीस यांनी म्हटले.

दरम्यान, शिवसेना (ठाकरे) नेते अंबादास दानवे यांनी या घटनेवरून सरकारला जाब विचारत आठ प्रश्न उपस्थित केले आहेत. तसेच गृहमंत्री म्हणून फडणवीस यांच्यावर टीका करत राजीनाम्याची मागणी केली आहे. त्यांनी महिला डॉक्टरने केलेल्या तक्रारी आणि माहिती अधिकाराच्या अर्जावर विलंब झाल्याबद्दल प्रश्न विचारले आहेत.