पुणे – पुण्यातील दीनानाथ मंगेशकर रुग्णालयात भरती होण्यासाठी आलेल्या गर्भवती तनिषा भिसे यांच्या मृत्यूप्रकरणी संताप वाढत आहे. प्रसूतीसाठी आलेल्या तनिषा यांना रुग्णालयाने १० लाख रुपये आगाऊ मागितल्याचा आरोप आहे. कुटुंबीयांनी अडीच ते तीन लाख रुपये देण्याची तयारी दर्शवली, तरीही प्रशासनाने दाखल करून उपचार सुरू केले नाहीत, असा दावा भिसे कुटुंबाने केला आहे. यामुळे तनिषा यांचा मृत्यू झाल्याने रुग्णालयावर पैशांच्या हव्यासाचा ठपका ठेवत नागरिक आंदोलन करत आहेत.

रुग्णालयाने तज्ञ समिती नेमून अहवाल सादर केला, परंतु भिसे कुटुंबाने तो खोटा ठरवला. “आम्ही तीन लाख रुपये देण्यास तयार होतो, पैसे घेऊन गेलो होतो, पण रुग्णालयाने ते स्वीकारले नाहीत. १० लाख भरल्याशिवाय उपचार न देण्याचा हट्ट धरला. आम्ही तिथे तीन-चार तास होतो, सीसीटीव्ही तपासा,” असे कुटुंबीय म्हणाले. त्यांनी रुग्णालयाच्या निष्काळजीपणामुळे दोन मुलांची आई गमावल्याचे सांगितले.

भाजप आमदार अमित गोरखे यांनीही अहवालावर आक्षेप घेत उद्या मुख्यमंत्री देवेंद्र फडणवीस यांना भेटण्याची घोषणा केली. “डॉ. घैसास, डॉ. केळकर आणि माझे पीए सुहास भिसे यांचे कॉल रेकॉर्ड तपासले तर सत्य बाहेर येईल. रुग्णालयाने १० लाख मागितल्याचे मान्य केले, पण तनिषाला कर्करोग होता हे खोटे आहे,” असे गोरखे म्हणाले.

रुग्णालयाच्या अहवालात तनिषा २०२० पासून उपचार घेत होत्या, २०२२ मध्ये ५०% सवलतीत शस्त्रक्रिया झाली आणि २०२३ मध्ये मूल दत्तक घेण्याचा सल्ला दिल्याचे म्हटले आहे. २८ मार्च २०२५ रोजी त्या सामान्य अवस्थेत आल्या, पण जोखमीमुळे भरतीचा सल्ला देऊन १०-२० लाख खर्च सांगितल्याचे रुग्णालयाने नमूद केले. कुटुंबीयांनी पैसे जमा करण्यास वेळ लावला आणि न सांगता निघून गेल्याचा दावा आहे. मात्र, भिसे कुटुंब आणि आंदोलकांनी हा अहवाल दिशाभूल करणारा ठरवला आहे.