Jamkhed News : डिंभे-माणिकडोह जोडबोगद्याच्या प्रकल्पाला राज्य सरकारने दिलेल्या स्थगितीवरून कर्जत-जामखेडचे आमदार रोहित पवार यांनी आक्रमक भूमिका घेतली आहे. त्यांनी जिल्हाधिकारी पंकज आशिया यांची भेट घेऊन बोगद्याच्या चौथ्या सुधारित प्रशासकीय मान्यतेवरील स्थगिती उठवून प्रकल्पाचे काम तातडीने सुरू करण्याची मागणी केली. येत्या ५ ऑक्टोबरपर्यंत सकारात्मक निर्णय न झाल्यास शेतकऱ्यांना सोबत घेऊन जनआंदोलन उभारण्याचा इशाराही त्यांनी दिला. (Jamkhed News)

डिंभे-माणिकडोह जोडबोगद्याच्या कामाला ८ सप्टेंबर रोजी झालेल्या मंत्रिमंडळ बैठकीत तूर्तास स्थगिती देण्यात आली होती. हा बोगदा कुकडी सिंचन प्रकल्पाच्या चौथ्या सुधारित प्रशासकीय मान्यतेमध्ये समाविष्ट करण्यात आला होता. या प्रकल्पाला आंबेगाव, शिरूर आणि जुन्नर परिसरातील शेतकरी व लोकप्रतिनिधींकडून विरोध होत असून, त्यांच्या हक्काच्या पाण्यावर परिणाम होण्याची भीती व्यक्त केली जात आहे. (Jamkhed News)

रोहित पवारांचा सातत्याने पाठपुरावा

रोहित पवार यांच्या म्हणण्यानुसार, ते गेल्या काही वर्षांपासून डिंभे-माणिकडोह जोडबोगद्यासाठी पाठपुरावा करत आहेत. या बोगद्यामुळे डिंभे धरणातून पावसाळ्यात वाहून जाणारे अतिरिक्त पाणी माणिकडोह धरणात वळवता येईल आणि त्यामुळे कर्जत-जामखेडसह पारनेर, श्रीगोंदा, जुन्नर आणि करमाळा तालुक्यांना सिंचनासाठी अतिरिक्त पाणी मिळू शकते, असा त्यांचा दावा आहे. (Jamkhed News)

रोहित पवार यांनी २०१८ मधील दिलीप वळसे पाटील यांच्या पत्राचा संदर्भ देत, बोगद्याबाबत पूर्वी वेगळी भूमिका मांडण्यात आली होती, असा सवालही उपस्थित केला आहे. याबाबत त्यांनी संबंधित पत्र सार्वजनिक केले होते. (Jamkhed News)

‘५ ऑक्टोबरपर्यंत निर्णय घ्या’

जिल्हाधिकाऱ्यांची भेट घेतल्यानंतर रोहित पवार यांनी सरकारने बोगद्यावरील स्थगितीचा पुनर्विचार करून काम सुरू करण्याबाबत निर्णय घ्यावा, अशी मागणी केली. ५ ऑक्टोबरपर्यंत निर्णय न झाल्यास जुन्नर, पारनेर, श्रीगोंदा आणि कर्जत परिसरातील शेतकऱ्यांना सोबत घेऊन जनआंदोलन करण्याचा इशारा त्यांनी दिला. (Jamkhed News)

दरम्यान, बोगद्याला स्थगिती देण्यामागे आंबेगावचे आमदार दिलीप वळसे पाटील यांच्या विरोधाची भूमिका कारणीभूत असल्याचा आरोप रोहित पवार यांनी केला आहे. मात्र, वळसे पाटील यांनी या प्रकल्पाला आंबेगाव, शिरूर आणि जुन्नरच्या शेतकऱ्यांच्या पाणीहक्काच्या मुद्द्यावरून विरोध केला आहे. त्यांच्या म्हणण्यानुसार, या भागातील शेतकऱ्यांच्या हक्काच्या पाण्यावर परिणाम होऊ नये, ही त्यांची भूमिका आहे. (Jamkhed News)

दुष्काळी परिस्थितीवरही उपाययोजनांची मागणी

या बैठकीत रोहित पवार यांनी कर्जत-जामखेडसह अहिल्यानगर जिल्ह्यातील दुष्काळी परिस्थितीचा मुद्दाही उपस्थित केला. मागणी असलेल्या गावांमध्ये टँकर आणि चारा छावण्या सुरू करणे, उपलब्ध जलस्रोतांचे नियोजन, विहिरी व बोअरवेल अधिग्रहित करणे, पीक नुकसानीसाठी आर्थिक मदत, कर्जमाफी योजनेचा आढावा, नियमित कर्जदारांना प्रोत्साहनपर अनुदान आणि चुकीच्या पीक कापणी प्रयोगांवर नियंत्रण ठेवण्याची मागणी त्यांनी केली. (Jamkhed News)

याशिवाय विद्यार्थ्यांची शुल्कमाफी, सीना प्रकल्पातून आवर्तन सोडणे आणि कर्जत-जामखेड मतदारसंघातील वीजपुरवठ्याचा प्रश्नही त्यांनी जिल्हाधिकाऱ्यांसमोर मांडला. नागरिकांना नियमित आणि पुरेसा वीजपुरवठा मिळावा, यासाठी संबंधित अधिकाऱ्यांना सूचना देण्याची मागणीही त्यांनी केली. (Jamkhed News)

दरम्यान, डिंभे-माणिकडोह बोगद्याबाबत अंतिम निर्णय काय होतो आणि रोहित पवार यांनी दिलेल्या ५ ऑक्टोबरच्या मुदतीनंतर आंदोलनाची भूमिका घेतली जाते का, याकडे पुणे आणि अहिल्यानगर जिल्ह्यातील शेतकऱ्यांचे लक्ष लागले आहे. (Jamkhed News)

Jamkhed News : साकत परिसरात गणेशोत्सवाचा अनोखा उत्साह! बिग बॉस फेम अभिजित बिचुकले व अभिनेत्री शमिका पालवे यांच्या हस्ते बाप्पाची आरती