शिरूर : केंद्र शासनाच्या डिजिटल क्रॉप सर्व्हे मोबाईल अॅपद्वारे शिरूर तालुक्यात ११ ऑगस्ट २०२६ पासून डिजिटल पीक पाहणीच्या कामाला सुरुवात करण्यात आली आहे. पिकांची अचूक, पारदर्शक आणि सुलभ पद्धतीने नोंद व्हावी, यासाठी शेतकऱ्यांनी या प्रक्रियेत सहभागी होऊन प्रशासनाला सहकार्य करावे, असे आवाहन शिरूरचे तहसीलदार बाळासाहेब म्हस्के यांनी केले आहे.

राज्य शासनाने Agristack संकल्पनेच्या अनुषंगाने डिजिटल पद्धतीने पीक पाहणी करण्याचा निर्णय घेतला आहे. त्यानुसार डिजिटल क्रॉप सर्व्हे (DCS) मोबाईल अॅपच्या माध्यमातून शेतातील उभ्या पिकांची नोंद करण्यात येत आहे. पारंपरिक पद्धतीच्या तुलनेत डिजिटल पद्धतीमुळे पिकांची नोंद अधिक अचूक आणि पारदर्शक होण्यास मदत होणार आहे.

या प्रक्रियेमध्ये गट क्रमांक किंवा सर्वे क्रमांकाच्या बांधापासून २० मीटरच्या आत उभे राहून पिकांचे छायाचित्र घेणे अनिवार्य करण्यात आले आहे. त्यामुळे संबंधित शेतातील प्रत्यक्ष उभ्या पिकांची नोंद डिजिटल प्रणालीमध्ये होणार आहे. शिरूर तालुक्यातील सर्व खातेदार व शेतकऱ्यांच्या पीक पाहणी नोंदणीसाठी ग्राम महसूल अधिकाऱ्यांकडून सहाय्यकांची नियुक्ती करण्यात आली आहे. संबंधित सहाय्यकांची यादी व माहिती ग्राम महसूल अधिकाऱ्यांकडे उपलब्ध असून शेतकऱ्यांनी आपल्या गावातील ग्राम महसूल अधिकाऱ्यांशी संपर्क साधून नियुक्त सहाय्यकाची माहिती घ्यावी.

त्यानंतर संबंधित सहाय्यकांच्या माध्यमातून शेतात प्रत्यक्ष जाऊन उभ्या पिकांचे छायाचित्र घेऊन डिजिटल पीक पाहणीची नोंदणी करून घ्यावी, असे प्रशासनाने स्पष्ट केले आहे. पिकांची अचूक नोंद होण्यासाठी शेतकऱ्यांचा सहभाग महत्त्वाचा डिजिटल पीक पाहणीमुळे शेतातील विविध प्रकारच्या पिकांची अचूक नोंद होण्यास मदत होणार आहे. त्यामुळे तालुक्यातील सर्व खातेदार व शेतकऱ्यांनी पीक पाहणीची नोंद वेळेत करून घेऊन या प्रक्रियेत सक्रिय सहभाग नोंदवावा, असे आवाहन तहसीलदार बाळासाहेब म्हस्के यांनी केले आहे.

“शेतकऱ्यांच्या पिकांची अचूक नोंद होणे महत्त्वाचे आहे. डिजिटल क्रॉप सर्व्हेच्या माध्यमातून ही प्रक्रिया अधिक पारदर्शक व सुलभ होणार असून, सर्व शेतकऱ्यांनी संबंधित सहाय्यकांशी संपर्क साधून आपल्या शेतातील उभ्या पिकांची पीक पाहणी नोंदणी करून घ्यावी आणि प्रशासनास सहकार्य करावे,” असे तहसीलदार म्हस्के यांनी सांगितले.