पुणेः कसबा विधानसभेचे माजी आमदार रविंद्र धंगेकर यांनी काँग्रेसला रामराम ठोकत आपल्या हाती धनुष्यबाण घेतला आहे. गेल्या काही दिवसांपासून धंगेकर काँग्रेस पक्षाला सोडचिठ्ठी देणार असल्याच्या चर्चा राजकीय वर्तुळात रंगल्या होत्या. मात्र, ते शिवसेनेत अधिकृत पक्षप्रवेश कधी करणार याबाबत माहिती नव्हती. अखेर काल १० मार्च रोजी धंगेकरांनी काँग्रेसची साथ सोडत शिवसेनेत पक्ष प्रवेश केला आहे. काँग्रेस पक्ष सोडत असल्याचे धंगेकरांनी माध्यमांनी दिलेल्या प्रतिक्रियेत सांगितले. मतदार संघातील मतदारांची कामे करण्यासाठी सत्तेत सहभागी असलेल्या पक्षात जात असल्याचे आणि मतदारसंघातील लोकांची भावना असल्याचे त्यांनी सांगितले. तसेच काँग्रेस पक्षातील सहकाऱ्यांनी निवडणुकीवेळी मोठी मदत केली. त्याबद्दलही त्यांनी काँग्रेस पाक्षाचे आभार मानले. यानंतर धंगेकरांच्या पक्ष प्रवेशावर शिवसेना उबाठाच्या उपनेत्या सुषमा अंधारेंनी आपली प्रतिक्रिया दिली आहे. रवींद्र धंगेकर कुठेही गेले तरी सदिच्छा. परंतु तुमच्या जाण्याने जिवाभावाची माणसं दुखावली आहेत. रवींद्र धंगेकरांच्या प्रचारात जीव तोडून आम्ही काम केले असल्याचे अंधारे यांनी सांगितले. तसेच कसब्याच्या जनतेने त्यांच्या प्रेमासाठी एक घोषणा तयार केली होती “फुले शाहू आंबेडकर आम्ही सारे धंगेकर” पण धगेकरांनी आता ट्रॅक बदलला आहे, असे त्या म्हणाल्या. संघाची माणसं मुखर्जी हेडगेवार गोळवलकर आम्ही सारे धंगेकर अशा घोषणा देतील का? असा सवालाही त्यांनी विचारला आहे. राऊत काय म्हणाले? एखाद्याने पक्षप्रवेश करावा म्हणून त्याची आर्थिक कोंडी केली जाते. जुन्या प्रकरणांवरून दबाव आणला जातो. रवींद्र धंगेकर यांनी पक्षांतर का केले? हे त्यांनी त्यांच्या दैवताला स्मरून सांगितले पाहिजे. कसबा विधानसभेतील गणेश पेठेत एक जमीन त्यांची पत्नी प्रतिभा रवींद्र धंगेकर आणि इतर भागीदार यांच्या नावावर आहे. त्या जागेची आजची किंमत ६० कोटी रुपये असल्याचे म्हटले जाते. ही जागा विकासासाठी ताब्यात घेतल्यानतंर लोकसभा निवडणुकीच्या काळात भाजपाच्या वतीने सदर जमीन वक्फ बोर्डाची असल्याचे सांगून न्यायालयात धाव घेण्यात आली. या माध्यमातून धंगेकर यांचे काम अडविण्यात आले आहे, असे शिवसेनेचे नेते संजय राऊत यांनी धंगेकरांच्या पक्ष प्रवेशावर सामनातून भाष्य केले आहे.
