मुख्यमंत्री देवेंद्र फडणवीस यांची विरोधकांवर टीका
Devendra Fadnavis: ज्यांना मोठ्या गाड्यांमधून फिरण्याची आणि मोठ्या बंगल्यांमध्ये राहण्याची सवय आहे, त्यांना शेतकऱ्यांना दिलेल्‍या पाच हजार रुपयांच्या मदतीची किंमत कळणार नाही. ही मदत म्हणजे केवळ सुरुवात असून, यापुढेही शेतकऱ्यांना आणखी मदत केली जाईल.

आज जे या मदतीवर टीका करीत आहेत, त्यांनीच यापूर्वी शेतकऱ्यांच्या तोंडाला पाने पुसली आहेत, अशा शब्दांत मुख्यमंत्री देवेंद्र फडणवीस यांनी विरोधकांवर निशाणा साधला. पंतप्रधानांनीही शेतकऱ्यांना मदत करण्याबाबत स्पष्ट भूमिका मांडल्याचे त्यांनी सांगितले.

पुण्यात माध्यमांशी संवाद साधताना त्यांनी शेतकरी मदत, पुण्यातील मेट्रो विस्तार आणि अन्य विषयांवर भूमिका मांडली. मेट्रो स्थानकांमध्ये पाणी गळतीसारख्या तक्रारींबाबत विचारले असता, मुख्यमंत्र्यांनी हिंजवडी ते शिवाजीनगर मेट्रो मार्गावरील काही स्थानकांचे काम अद्याप बाकी असल्याचे सांगितले.

संबंधित कामे पूर्ण झाल्यानंतर मेट्रोच्या कामाच्या गुणवत्तेबाबत भाष्य करता येईल, असे फडणवीस म्हणाले. अभिनेत्री दिया मिर्झाने सार्वजनिक रस्त्यांवर फटाके न फोडण्याचे आणि प्रदूषण टाळण्याचे आवाहन केले होते. मुंबई महापालिकेने आपल्या सोशल मीडिया अकाउंटवरून हा व्हिडिओ हटवला.

मुंबई उच्च न्यायालयाने या प्रकरणाची दखल घेत राजकीय नेत्यांच्या भूमिकेवर नाराजी व्यक्त केली, तसेच दिया मिर्झाचा हटविलेला व्हिडिओ पुन्हा अपलोड करण्याचे निर्देश दिले होते. याबाबत बोलताना फडणवीस म्‍हणाले, की न्यायालयाने अशा प्रकारे फटकारले असेल, असे आपल्याला वाटत नाही.

मुळात हे प्रकरण न्यायालयात गेलेच नव्हते. मुंबई महापालिकेने आपल्या स्तरावर जो निर्णय घेतला आणि त्यांना जे योग्य वाटले, त्यानुसार कार्यवाही केली, असे त्यांनी स्पष्ट केले. दिया मिर्झा या देशातील मोठ्या नेत्या नाहीत म्‍हणत त्यांनी या विषयावर अधिक भाष्य करण्याचे टाळले.