पिंपरी – शहरात अमली पदार्थांचा शिरकाव होणे हे केवळ व्यसन नसून आपल्या तरुणाईविरोधात पुकारलेले एक छुपे युद्ध आणि षडयंत्र आहे.

सिथॅटिक ड्रग्ज घरात किंवा बंद कारखान्यांमध्ये तयार होत असल्याने सतर्क राहण्याची गरज आहे. या छुप्या युद्धाला आणि वाढत्या गुन्हेगारीला रोखण्यासाठी राज्यातील पोलीस दलाला अत्याधुनिक बनवले जात आहे, असा ठाम विश्वास मुख्यमंत्री देवेंद्र फडणवीस यांनी व्यक्त केला.

पिंपरी-चिंचवड पोलीस आयुक्तालयाच्या नव्या मुख्यालयाच्या जागेच्या सातबारा हस्तांतरण आणि विविध विकासकामांच्या शुभारंभप्रसंगी ते बोलत होते. यावेळी उपमुख्यमंत्री एकनाथ शिंदे, उपमुख्यमंत्री सुनेत्रा पवार,

मंत्री चंद्रकांत पाटील, माधुरी मिसाळ, योगेश कदम, खासदार श्रीरंग बारणे, महापौर रवी लांडगे, पुण्याच्या महापौर मंजुषा नागपुरे, जिल्हाधिकारी जितेंद्र डुडी आणि पोलीस आयुक्त विनय कुमार चौबे यांच्यासह अनेक मान्यवर उपस्थित होते.

शिक्षेचा दर ७० टक्क्यांवर नेणार; तपास सारथी ठरणार गेमचेंजर
पोलीस दलाच्या कामगिरीचे कौतुक करताना मुख्यमंत्री म्हणाले, पूर्वी १०० पैकी केवळ १३ गुन्हेगारांना शिक्षा व्हायची, मात्र सक्षम तपास आणि पुराव्यांमुळे आता हा शिक्षेचा दर तब्बल ५० टक्क्यांवर पोहोचला असून लवकरच तो ७० टक्क्यांपर्यंत जाईल.

तपास अधिक अचूक व गतिमान करण्यासाठी आता तपास सारथी ही नवी यंत्रणा सज्ज करण्यात येत आहे, ज्यामुळे आरोपीला कठोर शिक्षा होण्यास मोठी मदत मिळेल.

तसेच, आर्टिफिशियल इंटेलिजन्स (एआय) मुळे स्ट्रीट क्राइम वेगाने आटोक्यात येत असून घटना घडत असतानाच पोलीस त्वरित पोहोचत आहेत. पोलिसांच्या पारदर्शकतेसाठी आणि सुरक्षेसाठी बॉडीवॉर्न कॅमेरे दिले जात आहेत, ज्यामुळे ना पोलीस अरेरावी करू शकतील, ना त्यांच्याशी कोणी मुजोरी करेल, असेही त्यांनी स्पष्ट केले.

ड्रग्जच्या मुळाशी जाऊन घाव घालणार
तरुणाई अमली पदार्थांच्या आहारी जात असल्याबद्दल चिंता व्यक्त करत मुख्यमंत्री म्हणाले, ड्रग्जसाठी पैसे नसल्यामुळे तरुण गुन्हेगारीकडे वळत आहेत.

खोकल्याच्या औषधांचा गैरवापर नशेसाठी होणार नाही, यावर सरकारचे बारीक लक्ष आहे. ड्रग्ज तयार करणार्‍यांच्या मुळाशी जाऊन त्यांना उद्ध्वस्त केले जाईल. तसेच व्यसनाधीन झालेल्या तरुणांना बाहेर काढण्यासाठी शहरात सपोर्ट ग्रुप्स सुरू करावे लागतील.

पिंपरी-चिंचवड दादांचे लाडके शहर: सुनेत्रा पवार
उपमुख्यमंत्री सुनेत्रा पवार म्हणाल्या की, पिंपरी-चिंचवडच्या विकासाचा पाया आपण आणखी भक्कम करत आहोत. हे शहर अजितदादांचे अत्यंत लाडके शहर होते.

शहराचा विकास आणि दादा यांचे अतूट नाते होते. पोलीस दलाने आधुनिक काळानुसार बदलणे आवश्यक असून, व्यसन ही केवळ कायदा-सुव्यवस्थेची समस्या नसून आपल्या भावी पिढीच्या अस्तित्वाचा प्रश्न आहे.

गुन्हेगारांपेक्षा पोलिसांकडे आधुनिक साधनसामग्री हवी: एकनाथ शिंदे
उपमुख्यमंत्री एकनाथ शिंदे म्हणाले, पिंपरी-चिंचवडचा कायापालट करण्यात अजितदादांचा मोठा वाटा राहिला आहे. आज इथले नागरिक अभिमानाने शहराचे नाव घेतात.

गुन्हेगारांकडे चांगल्या गाड्या असतील, तर पोलिसांकडे त्यांच्यापेक्षाही अद्ययावत व वेगवान वाहने असायला हवीत, म्हणूनच पोलीस दलाला आधुनिक वाहने दिली आहेत. आता नागरिकांच्या मनातील पोलिसांविषयीची भीती संपली आहे.

पोलीस दलाकडून एक कोटींची मदत
राज्यातील दुष्काळग्रस्त परिस्थिती लक्षात घेऊन पिंपरी-चिंचवड पोलीस दलाने सामाजिक बांधिलकी जपत आपल्या एका दिवसाचे वेतन मुख्यमंत्री सहायता निधीला दिले.

एक कोटी रुपयांचा हा धनादेश पोलीस आयुक्त विनय कुमार चौबे यांनी मुख्यमंत्र्यांकडे सुपूर्द केला. कार्यक्रमाच्या शेवटी मुख्यमंत्री देवेंद्र फडणवीस यांनी उपस्थितांना नशामुक्त समाज अभियानाची शपथ दिली.

कार्यक्रमाचे प्रास्ताविक पोलीस आयुक्त विनय कुमार चौबे यांनी केले, तर आभार अपर पोलीस आयुक्त सारंग आव्हाड यांनी मानले. राष्ट्रगीताने कार्यक्रमाची सांगता झाली.

Congress’s demand: प्रस्ताव रद्द करण्याची काँग्रेसची मागणी