नगर – नगर शहरातील पहिला सिमेंट कॉंक्रिटचा रस्ता 2008 मध्ये दिल्ली दरवाजा ते नेप्ती नाका दरम्यान करण्यात आला. परंतु आज या रस्त्याची बारावर्षांनंतर दुरवस्था झाला असून हा रस्ता आता मृत्यूचा सापळा बनला आहे. सिमेंट कॉंक्रिटच्या या रस्त्यामधील आता लोखंडी गज रस्त्यामधून बाहेर आले असून त्यामुळे वाहनचालकांना हे गज पाहून रस्त्याने जावे लागत आहे. दिवसा हे गज दिसत नाही तर रात्री अंधारात हे गज दिसले नाही तर मोठा अपघात होण्याची शक्‍यता आहे. याकडे महापालिका पदाधिकाऱ्यांसह प्रशासनाचे दुर्लक्ष आहे. विशेष म्हणजे शिवसेनेचे गटनेत्यांच्या प्रभाग हा रस्ता येतो. या गटनेत्यांचे संपर्क कार्यालय देखील या रस्त्यावर असूनही त्यांना या रस्त्याची दुरावस्था दिसत नाही.

नगर शहरात 2008 मध्ये पहिल्यांदा सिमेंट कॉंक्रिटचा रस्ता करण्यात आला होता. पावसाळ्यात निलक्रांती चौक ते दिल्ली दरवाजा दरम्यान पावसाचे पाण्यामुळे तळे निर्माण होत असल्याने या रस्त्याच्या दरम्यान मोठी गटार उभारून त्यानंतर दिल्ली दरवाजा ते नेप्ती नाका हा रस्ता सिमेंट कॉंक्रिटचा करण्यात आला होता. बारावर्षांनंतर या रस्त्याची आज दयनीय अवस्था झाली आहे. जागोजागी मोठ-मोठे खड्डे पडले आहे. या रस्त्यामधील खडी, वाळू व सिमेंट आता गायब होत असून रस्ता तयार करतांना वापरलेले स्टील म्हणजे लोखंडी गज उघडे पडले आहे. एवढेच नाही तर काही ठिकाणी हे गज पूर्णपणे बाहेर पडले आहे. त्यामुळे रस्त्याने चालतांना हे गज पाहून आता चालावे लागत आहे. दिल्ली दरवाजा ते नेप्ती या रस्त्यावर वाहनांची मोठी वर्दळ असते.

मोठ्या वाहनांसह दुचाकी, तीनचाकी वाहने या रस्त्याने ये-जा करीत असल्याने सातत्याने या रस्त्यावर वाहनांची गर्दी दिसते. त्यात या नेप्ती नाका येथे अमरधाम असल्याने याच रस्त्यावरून अंत्ययात्रा देखील जात असतात. हा रस्ता सध्या तरी सावेडी व मध्यवर्ती शहरासह अन्य उपनगरांना जोडणार आहे. त्यामुळे मोठी वर्दळ असतांनाही या रस्त्याच्या दुरवस्थेकडे पाहण्यास महापालिका पदाधिकाऱ्यासह प्रशासनाला वेळ नाही. डोळ्याला पट्टी बांधल्यागत पदाधिकारी व अधिकारी काम करीत असल्याचे दिसत आहे.

शिवसेनेचे गटनेत्यांच्या प्रभागत हा रस्ता असून संपर्क कार्यालय देखील या रस्त्यावर असतांनाही त्यांना रस्त्याची अवस्था दिसत नाही. या रस्त्याने एखादी दुर्घटना होण्याची वाट महापालिका पाहत असल्याचे दिसते. या रस्त्यावर मोकाट जनावरे देखील रस्त्याच्या मधोमध बसतात. अशावेळी वाहन चालकाला मार्ग काढावा लागतो. त्यात हे लोखंडी गज उघडे पडल्याने कधी काय होईल. हे सांगता येत नाही. अशी स्थिती आहे.