Daund News – दौंड तालुक्यातील गावठाण हद्दीमध्ये मार्च २०२० ते मे २०२० या कालावधीत भूमी अभिलेख कार्यालयामार्फत ड्रोनद्वारे मोजणी करण्यात आली होती. या मोजणीनंतर गावठाण हद्दीतील नागरिकांच्या मालमत्तांची सिटी सर्व्हेमध्ये नोंद करून प्रॉपर्टी कार्ड तयार केले आहे. मात्र, प्रक्रियेत अनेक नागरिकांच्या मालमत्तांच्या नोंदीमध्ये मालकाच्या नावाऐवजी महाराष्ट्र शासन, असा उल्लेख झाला आहे.

मालमत्तांची मोजणी व नोंदणीची प्रक्रिया शासकीय यंत्रणेमार्फत केल्यानंतरही नोंदीमध्ये झालेल्या चुकीच्या फटका आता नागरिकांना बसत आहे. चुकीची नोंद दुरुस्त करून घेण्यासाठी संबंधित नागरिकांना भूमी अभिलेख कार्यालयाच्या वारंवार फेऱ्या माराव्या लागत असून त्यात वेळ आणि पैसा दोन्ही खर्च होत आहेत. ड्रोनद्वारे मोजणी करताना व त्यानंतर सिटी सर्व्हे नोंदी तयार करताना संबंधित मालमत्ताधारकांच्या नोंदी योग्य पद्धतीने करण्यात आल्या असत्या,

तर आज नागरिकांना याचा त्रास झाला नसता प्रशासनाच्या नोंदणी प्रक्रियेतील चुकीच्या पद्धतीमुळे नाहक भुर्दंड नागरिकांना का सहन करावा लागत आहे, असा संतप्त सवाल उपस्थित झाला आहे. दरम्यान, अशा प्रकारे महाराष्ट्र शासन असा उल्लेख झालेल्या सर्व मालमत्तांच्या नोंदींची तपासणी करून त्या दुरुस्त करण्यासाठी विशेष मोहीम राबवावी, नागरिकांना वारंवार कार्यालयात चकरा मारण्याची वेळ येऊ नये, अशी मागणी नागरिकांकडून होत आहे.

पडताळणी करून दुरूस्ती सुरू
याबाबत दौंडचे उपअधीक्षक भूमी अभिलेख धनराज शिंदे म्हणाले की, या संदर्भात २०२३ मध्ये दुरुस्तीबाबत पत्र काढण्यात आले आहे. त्यानुसार नागरिकांकडून कागदपत्रांसह अर्ज प्राप्त झाल्यानंतर संबंधित जागेची मोजणी ग्रामपंचायतीचा अभिप्राय व इतर आवश्यक कागदपत्रांची पडताळणी करून प्रकरणानुसार दुरुस्ती करण्यात येत आहे. आतापर्यंत अशा प्रकारची अनेक प्रकरणे निकाली काढण्यात आली आहेत.