नवी दिल्ली : करोनाचा देशभरात थैमान सुरूच आहे. सर्वसामान्यांपासून ते बड्या व्यक्ती करोनाच्या बळी पडल्या आहेत. यात अनेक राजकीय नेत्यांनाही करोनाची लागण झाली आहे. काही लोकप्रतिनिधींना करोनामुळे आपला जीवही गमवावा लागला आहे. करोनावर नियंत्रण मिळवण्यासाठी अद्यापही प्रयत्न सुरु आहेत. मागील २४ तासांत भाजपाच्या पाच नेत्यांना करोनाची लागण झालीअसल्याची धक्कादायक माहिती समोर आली आहे.

केंद्रीय गृहमंत्री अमित शाह यांना रविवारी करोनाची लागण झाल्याचं समोर आले. करोनाची प्राथमिक लक्षणे दिसत असल्याने चाचणी केली असता आपला रिपोर्ट पॉझिटिव्ह आल्याचे अमित शाह यांनी सांगितले. अमित शाह यांनी डॉक्टरांच्या सल्ल्यानुसार आपण रुग्णालयात दाखल होऊन उपचार घेणार असल्याची माहिती दिली आहे. अमित शाह एम्स रुग्णालयात दाखल झाले आहेत
अमित शाह यांनी ट्विटमध्ये दिलेल्या माहितीनुसार, “करोनाची प्राथमिक लक्षणं दिसत असल्याने आपण चाचणी केली असता रिपोर्ट पॉझिटिव्ह आला आहे. माझी प्रकृती ठीक आहे, पण डॉक्टरांनी दिलेल्या सल्ल्यानुसार आपण रुग्णालयात दाखल होत आहोत. माझी विनंती आहे की, गेल्या काही दिवसांमध्ये जे लोक माझ्या संपर्कात आले आहेत त्यांनी स्वत:चं विलगीकरण करावं आणि आपली चाचणी करुन घ्यावी”. असे शाह यांनी म्हटले आहे.

तर दुसरीकडे कर्नाटकचे मुख्यमंत्री बी.एस.येडियुरप्पा यांनाही करोनाचा संसर्ग झाला असल्याचेही समोर आले आहे. येडियुरप्पा यांनीच ट्विटवरुन यासंदर्भात खुलासा केला आहे. माझी प्रकृती ठीक असून खबरदारीचा उपाय म्हणून मी रुग्णालयामध्ये दाखल झालो आहे अशी माहिती येडियुरप्पा यांनी ट्विटवरुन दिली आहे. माझी करोना चाचणी पॉझिटिव्ह आली आहे. माझी प्रकृती ठीक आहे. डॉक्टरांच्या सल्ल्याप्रमाणे मी खबरदारीचा उपाय म्हणून रुग्णालयामध्ये दाखल झालो आहे. माझ्या संपर्कात आलेल्यांनी स्वत:ला क्वारंटाइन करावे अशी मी विनंती करतो,” असं ट्विट येडियुरप्पा यांनी केलं आहे.

उत्तर प्रदेश भाजपाचे प्रदेश अध्यक्ष स्वतंत्र देव सिंह यांनाही रविवारी करोनाची लागण झाल्याचे समोर आले. त्यांनी ट्विट करत माहिती दिली आहे. स्वतंत्र देव सिंह यांनी ट्विट करत म्हटले की, ‘लक्षणे दिसल्यानंतर करोनाची चाचणी केली असता माझा रिपोर्ट पॉझिटिव्ह आला आहे. माझ्या संपर्कात आलेल्या सर्वांना निवेदन आहे की नियमांनुसार त्यांनी क्वारंटाइन व्हावं तसेच गरज पडल्यास करोना चाचणी करावी.’

उत्तर प्रदेश योगी सरकारमधील मंत्री डॉक्टर महेंद्र सिंह यांचा रविवारी करोना रिपोर्ट पॉझिटिव्ह आला आहे. आग्राच्या भाजपा आमदार योगेंद्र उपाध्याय यांना करोना झाल्याचं रविवारी समोर आलं. सध्या त्यांच्यावर खासगी रुग्णालयात उपचार सुरु आहेत. योगेंद्र उपाध्याय यांच्या पत्नी, दोनं मुलं आणि सूनेलाही करोनाची बाधा झाली आहे.