नवी दिल्ली: काँग्रेसचे ज्येष्ठ नेते आणि मध्य प्रदेशचे माजी मुख्यमंत्री दिग्विजय सिंह यांनी पंतप्रधान नरेंद्र मोदी आणि भाजपचे ज्येष्ठ नेते लालकृष्ण अडवाणी यांचा एक जुना फोटो सोशल मीडियावर पोस्ट केल्याने राजकीय वर्तुळात मोठा पेच निर्माण झाला आहे. या पोस्टमध्ये त्यांनी चक्क राष्ट्रीय स्वयंसेवक संघ (RSS) आणि भाजपच्या संघटन कौशल्याची स्तुती केल्याने काँग्रेसमध्ये एकच खळबळ उडाली. मात्र, वाद वाढताच सिंह यांनी आपली भूमिका स्पष्ट करत सारवासारव केली आहे. नेमके प्रकरण काय? दिग्विजय सिंह यांनी त्यांच्या ‘X’ (ट्विटर) हँडलवर एक कृष्णधवल (Black and White) फोटो शेअर केला आहे. या फोटोत लालकृष्ण अडवाणी खुर्चीवर बसलेले दिसत असून, नरेंद्र मोदी त्यांच्या पायापाशी जमिनीवर बसलेले आहेत. हा फोटो पोस्ट करताना दिग्विजय सिंह यांनी लिहिले की, “Quora वर मला हे चित्र सापडले. हे अत्यंत प्रभावशाली आहे. कशाप्रकारे RSS चा जमिनीवर काम करणारा स्वयंसेवक आणि जनसंघाचा (भाजप) कार्यकर्ता नेत्यांच्या चरणांशी जमिनीवर बसून पुढे राज्याचा मुख्यमंत्री आणि देशाचा पंतप्रधान बनला. ही संघटनेची ताकद आहे. जय सिया राम.” या पोस्टमध्ये त्यांनी राहुल गांधी, मल्लिकार्जुन खर्गे आणि प्रियांका गांधी यांसारख्या वरिष्ठ काँग्रेस नेत्यांनाही टॅग केल्याने पक्षांतर्गत वाद उफाळून आला. काँग्रेसमध्ये अस्वस्थता, मग दिग्विजय सिंहांचे स्पष्टीकरण आपल्याच नेत्याकडून शत्रू पक्षाच्या संघटनेचे कौतुक झाल्याने काँग्रेसमधील अनेक कार्यकर्त्यांनी आणि नेत्यांनी नाराजी व्यक्त केली. सोशल मीडियावर टीका सुरू झाल्यावर दिग्विजय सिंह यांनी तातडीने स्पष्टीकरण दिले. ते म्हणाले की, “माझ्या टिप्पणीचा चुकीचा अर्थ काढला गेला आहे. मी केवळ एका मजबूत संघटनात्मक रचनेचे कौतुक केले आहे. मी संघाचा आणि मोदीजींचा कट्टर विरोधक होतो, आहे आणि उद्याही राहीन. संघटना मजबूत करणे आणि तिची प्रशंसा करणे यात काय चुकीचे आहे?” ‘कट्टर विरोधकच राहणार’ दिग्विजय सिंह यांनी पुढे स्पष्ट केले की, जरी त्यांनी भाजपच्या संघटन शक्तीचा उल्लेख केला असला, तरी त्यांच्या विचारधारेला त्यांचा विरोध कायम आहे. “मी संघटनेच्या शिस्तीचे समर्थन करतो, पण आरएसएसच्या विचारधारेचा घोर विरोधक आहे,” असे सांगत त्यांनी वादावर पडदा टाकण्याचा प्रयत्न केला. सध्या सोशल मीडियावर या पोस्टवरून जोरदार चर्चा रंगली असून भाजप समर्थकांकडून यावर संमिश्र प्रतिक्रिया येत आहेत.
