भुवनेश्‍वर : माजी पंतप्रधान मनमोहन सिंग यांच्या अंत्यविधीवरून कॉंग्रेस आणि त्या पक्षाचे नेते राहुल गांधी राजकारण करत आहेत, असा पलटवार भाजपने केला. भाजपचे प्रवक्ते संबित पात्रा यांनी पत्रकार परिषद घेऊन पक्षाची भूमिका मांडली. सिंग यांच्या निधनानंतर केंद्र सरकारने तातडीने त्यांचे स्मारक उभारण्याची तयारी सुरू केली.

केंद्रीय मंत्रिमंडळाची बैठक बोलावण्यात आली. त्यामध्ये सिंग यांना आदरांजली वाहण्यात आली. त्यांच्या सकारात्मक योगदानाच्या स्मृती जतन करण्याच्या उद्देशातून स्मारक उभारण्याचा निर्णय घेण्यात आला. त्याविषयीची माहिती सिंग यांच्या कुटूंबीयांना आणि कॉंग्रेसला देण्यात आली. मात्र, भूसंपादन, ट्रस्टची स्थापना आणि इतर औपचारिकता पूर्ण करण्यासाठी काही अवधी लागेल.

तोपर्यंत अंत्यविधीसाठी थांबता येऊ शकत नाही, असे ते म्हणाले. याआधी कॉंग्रेसने माजी पंतप्रधान पी.व्ही.नरसिंह राव, माजी राष्ट्रपती प्रणब मुखर्जी या स्वपक्षीय नेत्यांचाच अवमान केल्याचा प्रत्यारोपही त्यांनी केला.