Congress – BJP – विशेष संक्षिप्त पुनरीक्षण म्हणजे एसआयआर मोहीम आणि कथित मतचोरीच्या मुद्द्यावरून देशातील राजकीय वातावरण चांगलेच तापले आहे. काँग्रेस आणि इंडिया आघाडीने १ नोव्हेंबर रोजी दिल्लीतील ऐतिहासिक रामलीला मैदानावर भव्य रॅली काढण्याची घोषणा केली आहे.

तर दुसरीकडे, काँग्रेसच्या या आरोपांना प्रत्युत्तर देण्यासाठी भारतीय जनता पक्षाने २ नोव्हेंबर रोजी तेलंगणात केंद्रीय गृहमंत्री अमित शहा यांच्या उपस्थितीत पदयात्रेचे आयोजन केले आहे.

काँग्रेस अध्यक्ष मल्लिकार्जुन खर्गे यांनी सोशल मीडियावर एक व्हिडिओ संदेश जारी करत वोट बचाओ, देश बचाओ या रॅलीची घोषणा केली.

मुख्य निवडणूक आयुक्त ज्ञानेश कुमार यांच्यावर गंभीर आरोप करत खर्गे यांनी त्यांच्या राजीनाम्याची आणि एसआयआर प्रक्रिया त्वरित थांबवण्याची मागणी केली आहे. लोकशाही व संविधानाच्या रक्षणासाठी नागरिकांनी या रॅलीत मोठ्या संख्येने सहभागी व्हावे असे आवाहन त्यांनी केले.

काँग्रेस आणि विरोधी पक्षांचे हे सर्व आरोप भाजपने पूर्णपणे फेटाळून लावले आहेत. तेलंगणा भाजप अध्यक्ष एन. रामचंद्र राव यांनी सांगितले की, काँग्रेस देशात आणि राज्यात अराजकता पसरवण्याचा प्रयत्न करत आहे.

याविरोधात भाजप लोकशाही वाचवा, अराजकता हटवा या संकल्पनेसह पदयात्रा काढणार असून, २ नोव्हेंबरला केंद्रीय गृहमंत्री अमित शहा या पदयात्रेत सहभागी होणार आहेत.

काँग्रेसने १३ कोटी मतदारांची नावे हटवल्याचा आरोप केला होता. यावर स्पष्टीकरण देताना राव म्हणाले, २.८ कोटी मतदार मृत झाले होते. ३ कोटी मतदार तपासणीदरम्यान अनुपस्थित किंवा सापडले नाहीत, ६.३ कोटी मतदार हे कायमस्वरूपी दुसऱ्या ठिकाणी स्थलांतरित झाले आहेत.

सुमारे १ कोटी मतदारांची नावे एकापेक्षा जास्त ठिकाणी नोंदवली गेली होती. ज्या वैध मतदारांची नावे चुकीने वगळली गेली असतील, त्यांना पुन्हा नाव नोंदवण्याचा पूर्ण पर्याय उपलब्ध आहे.

तसेच, तेलंगणातील काँग्रेस सरकारवर निशाणा साधत त्यांनी सांगितले की, सध्या राज्यातील अनेक जिल्ह्यांत दुष्काळजन्य परिस्थिती असून पाणीटंचाई निर्माण झाली आहे. काँग्रेस नेत्यांनी दिल्लीत रॅली काढण्याऐवजी राज्यातील पाणीटंचाईच्या समस्येकडे लक्ष द्यावे.