आळंदी : आळंदी येथे भक्ती, कला आणि आधुनिक तंत्रज्ञानाचा अनोखा संगम असलेला 1 किलो शुद्ध सोन्याचा अलंकारी मुकुट श्री ज्ञानेश्वर माऊलींच्या चरणी अर्पण करण्यात आला. नांदेड येथील भक्त दांपत्य भारत रामिनवार आणि मिरा रामिनवार यांनी सुमारे 1 कोटी रुपये किंमतीचा हा भव्य मुकुट “ज्ञानेश्वर महाराज संस्थान, आळंदी” येथे भक्तिभावाने अर्पण केला.

हा मुकुट पुण्यातील प्रख्यात पु. ना. गाडगीळ आणि सन्स लि. यांनी चार महिन्यांच्या अथक परिश्रमानंतर तयार केला आहे. पारंपरिक नक्षीकाम, धार्मिक प्रतीकांची कोरीव रचना आणि आधुनिक 3D तंत्रज्ञानाचा वापर यातून या मुकुटाला अनन्य सौंदर्य प्राप्त झाले आहे. कमळ, चक्र, सूर्यकिरण यांसारख्या मंगल प्रतीकांनी हा मुकुट सजवला असून, वारकरी परंपरेशी नाते जोडणाऱ्या कुशल कारागिरांनी तो भक्तिपूर्ण मनाने घडवला आहे.

या मुकुटाच्या अर्पण सोहळ्यासाठी योगी निरंजननाथ (प्रमुख विश्वस्त), डॉ. भावार्थ देखणे (विश्वस्त व पालखी सोहळा प्रमुख), ज्ञानेश्वर वीर (व्यवस्थापक) आणि ॲड. राजेंद्र उमाप (विश्वस्त) उपस्थित होते. त्यांच्या साक्षीने माऊलींना हा मुकुट भक्तिपूर्वक अर्पण करण्यात आला. हा अलंकारी मुकुट विशेष धार्मिक प्रसंगी माऊलींना परिधान केला जाणार असून, तो भाविकांसाठी श्रद्धा, भक्ती आणि अभिमानाचे प्रतीक ठरेल.

आधुनिक तंत्रज्ञान आणि पारंपरिक श्रद्धेचा हा सुंदर मिलाफ काळानुरूप भक्तीची अभिव्यक्ती आहे. रामिनवार दांपत्याच्या या अनमोल अर्पणामुळे संत ज्ञानेश्वर माऊलींच्या सेवेत जोडली गेलेली ही कलाकृती भाविकांच्या हृदयात कायमचे स्थान मिळवेल, यात शंका नाही.