इस्लामाबाद – गोपनीय कागदपत्रे लीक केल्याप्रकरणी पाकिस्तानच्या सर्वोच्च न्यायालयाने माजी पंतप्रधान इम्रान खान यांना मोठा दिलासा दिला आहे. सुप्रीम कोर्टाने इम्रान खान आणि पाकिस्तानचे माजी परराष्ट्र मंत्री शाह महमूद कुरेशी यांना जामीन मंजूर केला आहे. सर्वोच्च न्यायालयाने दोन्ही नेत्यांना प्रत्येकी १० लाख रुपयांच्या जातमुचलक्यावर जामीन मंजूर केला आहे.

न्यायमूर्ती सरदार तारिक मसूद यांच्या अध्यक्षतेखालील खंडपीठाने हा आदेश दिला. मात्र, इम्रान खान भ्रष्टाचाराच्या एका प्रकरणात तीन वर्षांच्या तुरुंगवासाची शिक्षा भोगत आहेत. अशा परिस्थितीत गोपनीय कागदपत्रे सार्वजनिक केल्याप्रकरणी जामीन मिळूनही इम्रान खान तुरुंगातून बाहेर पडू शकणार नाहीत.

2022 मध्ये, इम्रान खान यांच्या नेतृत्वाखालील पीटीआय सरकार अविश्वास ठरावात अपयशी ठरल्यानंतर पडले. एका षड्यंत्राचा एक भाग म्हणून अमेरिकेने लष्करासह त्यांची सत्तेतून हकालपट्टी केल्याचा आरोप पीटीआयने केला आहे. सरकार पडल्यानंतर इम्रान खान यांनी एका रॅलीत एक पत्र दाखवले आणि दावा केला की त्यांच्याकडे पुरावे आहेत की अमेरिकेने त्यांचे सरकार पाडण्यासाठी लष्करासोबत कट रचला होता.

मात्र, पाकिस्तानी लष्कर आणि अमेरिकन सरकारने हे आरोप फेटाळून लावले. इम्रान खान यांनी रॅलीत जे पत्र दाखवले ते गोपनीय राजनयिक पत्र असल्याचा आरोप आहे. यानंतर, अधिकृत गोपनीय दस्तऐवज उघड केल्याच्या आरोपाखाली इम्रान खान विरुद्धच्या खटल्याची सुनावणी २३ ऑक्टोबर २०२३ रोजी सुरू झाली.