हैदराबाद : कोरोनासमोर संपूर्ण जग हतबल झाले आहे. अशातच जगभरातील अनेक वैज्ञानिक या विषाणूवर प्रतिबंध घालण्यासाठी लस शोधण्याचा प्रयत्नात आहेत. अशातच भारतातही कोरोनाचा प्रादुर्भाव वाढत आहे. भारतात कोरोनावर लस शोधण्यात येत असून भारतीय औषधी महानियंत्रक (डीसीजीआय) ने मानवी चाचणीसाठी परवानगी दिली आहे. ‘कोवॅक्सिन’ (COVAXIN) नावाची कोरोनाची पहिली लस भारत बायोटेक ने इंडियन काऊंसिल ऑफ मेडिकल रिसर्च (ICMR) आणि राष्ट्रीय विषाणू विज्ञान संस्था (NIV) सोबत एकत्र येऊन तयार केली आहे. याविषयीची माहिती कंपनीने एका ट्विटच्या माध्यमातून  दिली आहे.

COVAXIN™, India’s 1st indigenous Covid-19 vaccine, developed by Bharat Biotech successfully enters human trials.

@ICMRDELHI @DBTIndia @icmr_niv #BharatBiotech #COVAXIN #covid19 #Collaboration #Indiafightscorona #makeinindia #ICMR #coronavirusvaccine pic.twitter.com/MSehntuE8d

— BharatBiotech (@BharatBiotech) June 29, 2020

जुलै महिन्यापासून या लसीची मानवी चाचणी सुरू केली जाणार असल्याची माहिती भारत बायोटेक कडून देण्यात आली. “एसएआरएस-सीओव्ही -२ स्ट्रेनला पुण्यातील एनआयव्हीमध्ये वेगळे करण्यात आले आणि नंतर भारत बायोटेक कडे वर्ग करण्यात आले. हैदराबादच्या जिनोम व्हॅलीमध्ये असलेल्या भारत बायोटेक च्या बीएसएल -3 (Bio-Safety Level 3) हाय कन्टेंनमेंट फॅसिलिटीमध्येही कोरोनाची पहिली लस विकसित करण्यात आली, असे कंपनीने निवेदनात म्हटले आहे.

भारतातील ड्रग कंट्रोलर जनरल ऑफ इंडिया, सेंट्रल ड्रग्स स्टँडर्ड कंट्रोल ऑर्गनायझेशन (सीडीएससीओ), आरोग्य व कुटुंब कल्याण मंत्रालयाने फेज १ आणि फेज २ मानवी वैद्यकीय चाचण्या सुरू करण्यास परवानगी दिली आहे. या अगोदर कंपनीने प्रीक्लिनिकल अभ्यासामधून मिळविलेले निकाल सादर केले होते. मानवी वैद्यकीय चाचण्या पुढील महिन्यात देशभरात सुरू होणार आहेत.

दरम्यान, कोविड -१९ वरील देशात विकसित केलेली ही देशातील कोरोनाची पहिली लस असून आम्हाला त्याचा अभिमान असल्याचे मत भारत बायोटेक चे अध्यक्ष व व्यवस्थापकीय संचालक डॉ. कृष्णा एला यांनी व्यक्त केले. तसेच या लसीच्या विकासात आयसीएमआर आणि एनआयव्हीचा सहभाग हा महत्त्वपूर्ण होता. सीडीएससीओच्या सक्रिय सहकार्याने आणि मार्गदर्शनाने याला मंजुरी देण्यात आली.

आमच्या संशोधन टीमने आणि उत्पादन टीमने आमच्या स्वतःच्या तंत्रज्ञानाच्या सहाय्याने यासाठी अथक परिश्रम घेतले असल्याचेही डॉ. कृष्णा एला यांनी म्हटले आहे. याबरोबरच सर्व प्रोटोकॉल्स पूर्ण करून कंपनीने वैद्यकीय चाचणी पूर्वीचा अभ्यास पूर्ण करण्याच्या उद्देशाने या संशोधनाला गती देण्यात आली. तसेच या अभ्यासाचे परिणाम प्रभावी असल्याचेही त्यांनी यावेळी म्हटले.