Pune Municipal Corporation Election : राज्यातील स्थानिक स्वराज्य संस्थांच्या निवडणुकांचे सर्वांना वेध लागलेले आहे. या निवडणुकांच्या अनुषंगाने स्थानिक पातळीवरील समीकरणे बदलणार असल्याचे चित्र आहे. या निवडणुकीकडे मिनी विधानसभेची निवडणूक म्हणून पाहिले जात आहे. शक्य तिथे महायुती आणि जिथे अडचण असेल, तिथे स्थानिक नेत्यांशी चर्चा करून अंतिम निर्णय घेतला जाणार असल्याचे सूतावोच याअगोदरच महायुतीच्या तिन्ही पक्षांच्या प्रमुखांनी दिले आहेत. नुकतेच मुख्यमंत्री देवेंद्र फडणवीस पुणे दौऱ्यावर आले होते. या दौऱ्यादरम्यान फडणवीसांच्या उपस्थित एक महत्वाची बैठक पार पडली. या बैठकीनंतर माध्यमांशी बोलताना मुख्यमंत्री देवेंद्र फडणवीस यांनी एका प्रश्नावर उत्तर देताना स्ट्राँग उमेदवार असेल तर त्याला पक्षात घेतले जाणार असल्याचे विधान केले. त्यांनी केलेल्या विधानानंतर राज्याच्या राजकारणात लवकरच अनेक बड्या नेत्यांचे पक्षप्रवेश होणार असल्याची चर्चा जोर धरू लागली आहे. काँग्रेसला मोठा धक्का ? आगामी महापालिका निवडणुकीच्या अनुषंगाने पुण्यामध्ये भाजप मास्टरस्ट्रोक खेळी खेळणार असल्याच्या तयारीत आहे. भाजपमध्ये लवकरच मोठे पक्ष प्रवेश पार पडणार असून या पक्ष प्रवेशाचा काँग्रेसला मोठा धक्का बसणार आहे. तर राष्ट्रावादी आणि आरपीआय पक्षाला देखील याची झळ बसू शकते, असे सांगितले जात आहे. दिवाळीपूर्वीच भाजपमध्ये १५ पक्ष प्रवेश घडून आणण्यात येणार असल्याचे सांगितले जात आहे. याची यादीही तयार करण्यात आलेली आहे. या यादीत काँग्रेसमधून पाच ते सहा माजी नगरसेवकांसह मोठा नेता भाजपमध्ये प्रवेश करणार आहे. यामुळे सगळ्यात मोठे खिंडार काँग्रेसला पडणार असल्याची शक्यता आहे. याचा थेट परिणाम पक्षाला निवडणुकीत बसू शकतो. चार ते पाच मोठे पक्ष प्रवेश त्यासोबतच उपमुख्यमंत्री अजित पवार यांच्या राष्ट्रवादीतूनही 1 ते 2 माजी नगरसेवक भाजपमध्ये प्रवेश करणार आहेत. याच पक्षातले इतर मोठे चार ते पाच प्रवेश भाजपमध्ये होणार आहेत. केंद्रीय मंत्री रामदास आठवले यांच्या पक्षातून देखील एक बडा नेता भाजपवासी होणार असल्याची शक्यता वर्तवण्यात आली आहे. या 15 जणांमध्ये कोणकोणती नाव आहेत. याबाबतच्या यादीची चर्चा राजकीय वर्तुळात सुरू झाली आहे. मात्र, याबाबत भाजपकडून कोणतीही अधिकृत माहिती समोर आलेली नाही. हेही वाचा : दिवाळीपूर्वी सोन्याची चकाकी वाढली ! सव्वा लाखांच्या पुढे गेली सोन्याची किंमत, तुमच्या शहरात आज काय भाव? वाचा
