खुटबाव : रस्ते बांधकामासाठी लागणाऱ्या सिमेंट काँक्रिटच्या निर्मितीसाठी खुटबाव परिसरात उभारण्यात आलेल्या प्रकल्पामुळे गलांडवाडी येथील पवार वस्तीतील नागरिकांना गेल्या दोन वर्षांपासून धुळीचा मोठा त्रास सहन करावा लागत असल्याची तक्रार स्थानिक नागरिकांनी केली आहे. प्रकल्पातून दिवसरात्र मोठ्या प्रमाणावर धुळीचे कण हवेत पसरत असून, ही धूळ थेट नागरिकांच्या घरात तसेच परिसरातील शेतजमिनीवर जात असल्याचे नागरिकांचे म्हणणे आहे. त्यामुळे घरातील वस्तूंवर धुळीचा थर साचत आहेत. नागरिकांच्या आरोग्यावरही त्याचा विपरित परिणाम होण्याची भीती व्यक्त होत आहे.

धुळीमुळे परिसरातील पिकांचेही नुकसान होत असल्याचा आरोप शेतकऱ्यांनी केला आहे. शेतीच्या उत्पादनावर परिणाम होत असल्याने संबंधित शेतकऱ्यांमध्ये संतापाची लाट उसळली आहे. दरम्यान, एका कन्स्ट्रक्शन कंपनीचे काम या परिसरात सुरू असून, बांधकामासाठी होणारी वाहतूक, साहित्याची हाताळणी आणि प्रकल्प परिसरातील धुळीचे नियंत्रण याबाबत योग्य त्या उपाययोजना केल्या जात नसल्याचा आरोप नागरिकांनी केला आहे.

प्रकल्पाच्या परिसरात नियमित पाणी फवारणी, धूळ नियंत्रणासाठी आवश्यक यंत्रणा, वाहतुकीदरम्यान वाहनांवर योग्य झाकण तसेच रस्त्यांची स्वच्छता याबाबत प्रशासनाने पाहणी करावी, अशी मागणी नागरिकांनी केली आहे. या कंपनीच्या शेजारी कै अनाजी खाडे निराधार मुलांचे बालकाश्रम असून त्या मुलांचा सुद्धा आरोग्याचा प्रश्न आता सध्या महत्त्वाचा ठरत आहे.

शेती व्यवसायाला तडाखा

धुळीमुळे नागरिकांच्या आरोग्यासह शेतीचे नुकसान होत असल्याच्या तक्रारींची संबंधित प्रदूषण नियंत्रण विभाग, महसूल प्रशासन व ग्रामपंचायतीने तातडीने दखल घेऊन प्रत्यक्ष पाहणी करावी आणि नियमांचे उल्लंघन आढळल्यास संबंधितांवर कारवाई करावी, अशी मागणी पवार वस्तीतील नागरिक व शेतकऱ्यांकडून होत आहे.

लोकवस्तीत या कंपनीला कोणी परवानगी दिली. आमच्या घरात लहान मुले व वृद्ध माणसे असून त्यांचा आरोग्याचा प्रश्न सध्या एरणीवर आहे.आमच्या अन्नात या कंपनीने सिमेंट मिसळली आहे. यांच्याकडे पर्यावरण व इतर संबंधित प्रशासनाची अधिकृत परवानगी नाही तरी या कंपनीवरती कायदेशीर कारवाई करण्यात यावी.
-संभाजी पवार, स्थानिक नागरिक.