Chinchwad Road Encroachment – काळेवाडीतून चिंचवड गावात आल्यावर डाव्या बाजूला मोरया हॉस्पिटलकडे जाणाऱ्या महापालिकेच्या मुख्य रस्त्याला सध्या अतिक्रमणाचा मोठा विळखा पडला आहे. पूर्वी ज्या जागेवर नागरिक आपली दुचाकी वाहने शिस्तीत पार्क करत होते, त्या सार्वजनिक रस्त्यावर आता स्थानिक हॉटेल चालकाने बेकायदेशीरपणे कब्जा केला आहे. ​गेल्या काही दिवसांपासून या ठिकाणी हॉटेल चालकांनी चक्क रस्त्यावरच टेबल आणि खुर्च्या मांडून ग्राहकांसाठी ‘ओपन एअर डायनिंग’ सुरू केले आहे.

परिणामी, येथे येणाऱ्या नागरिकांना दुचाकी पार्क करण्यासाठी कोणतीही जागा शिल्लक राहिलेली नाही. नाइलाजाने वाहनचालकांना रस्त्यावर मिळेल तिथे वाहने अस्ताव्यस्त उभी करावी लागत आहेत. यामुळे या परिसरात दररोज प्रचंड वाहतूक कोंडी निर्माण होत असून, वाहनचालक आणि पादचाऱ्यांना मोठा मनस्ताप सहन करावा लागत आहे. या अतिक्रमणासोबतच आणखी एक डोकेदुखी वाढली आहे. हे हॉटेल चालक सकाळीच अत्यंत मोठ्या आवाजात गाणी लावतात. या ध्वनीप्रदूषणामुळे परिसरातून जाणाऱ्या नागरिकांना साधे फोनवर बोलणेही कठीण झाले आहे.

​अतिक्रमण विभाग निद्रिस्त का?
अतिक्रमण मुक्‍त पदपथ अशी घोषणा महापालिका आयुक्‍तांनी केली होती. त्‍यावेळी देखील या अतिक्रमणावर कारवाई झालेली नव्‍हती. धक्कादायक बाब म्हणजे, डोळ्यांदेखत सुरू असलेला हा सगळा प्रकार पिंपरी-चिंचवड महापालिकेच्या ब प्रभाग अतिक्रमण विभागाला माहीत आहे. मात्र, तरीही या विभागाकडून कोणतीही कारवाई केली जात नसल्याने नागरिकांमधून तीव्र संताप व्यक्त होत आहे. “महापालिका प्रशासन या हॉटेल चालकांवर मेहेरबान का? हा परिसर कधी अतिक्रमणमुक्त होणार?” असा संतप्त सवाल आता त्रस्त नागरिक विचारत आहेत.