Norway Chess 2024 : नॉर्वे बुद्धिबळ स्पर्धेत भारतीय ग्रँडमास्टर आर वैशाली आणि तिचा भाऊ प्रग्नानंद यांच्यासाठी तो संमिश्र दिवस होता. महिला गटात वैशालीने स्वीडनच्या पिया क्रॅमलिंगचा पराभव केला, तर पुरुष गटात प्रज्ञानंदला चौथ्या फेरीत अमेरिकेच्या हिकारू नाकामुराकडून पराभव स्वीकारावा लागला.

या पराभवानंतर प्रज्ञानंद 5.5 गुणांसह चौथ्या स्थानावर घसरला आहे. विशेष म्हणजे पुरुष गटात या दिवशी सर्व सामन्यांचे निकाल लागले, परंतु प्रग्नानंदला प्रभाव पाडता आला नाही आणि तो पराभूत झाला.

वैशालीने नोंदविला दुसरा विजय

क्लासिकल प्रकारातील वैशालीचा हा दुसरा विजय असून तिने 2.5 गुणांची भक्कम आघाडी मिळवली आहे. या भारतीय खेळाडूने एकूण 8.5 गुण मिळवले आहेत. तिच्यानंतर महिला विश्वविजेती चीनची वेनजुन झू आणि युक्रेनची ॲना मुझीचुक संयुक्त दुसऱ्या स्थानावर आहेत. मुझीचुकने भारताच्या कोनेरू हम्पीचा पराभव करून स्पर्धेतील तिच्या पहिल्या विजयाची नोंद केली, तर वेनजुनने आर्मागेडनमध्ये तिची देशबांधव टिंगजी लेईचा पराभव केला. सहा खेळाडूंमध्ये दुहेरी राऊंड रॉबिन पद्धतीने खेळल्या जात असलेल्या या स्पर्धेत सहा फेऱ्यांचे खेळ खेळायचे बाकी आहेत. लेई पाच गुणांसह चौथ्या स्थानावर आहे. हम्पी आणि क्रॅमलिंगचे प्रत्येकी तीन गुण आहेत.

Norway Chess 2024 : प्रज्ञानंदने रचला इतिहास, क्लासिकल चेस प्रकारात प्रथमच कार्लसनला केलं पराभूत…

कार्लसन विजयी, नाकामुरा अव्वल स्थानावर…

पुरुष गटात जगातील अव्वल क्रमांकाचा खेळाडू मॅग्नस कार्लसनने आपला कट्टर प्रतिस्पर्धी अमेरिकेच्या फॅबियानो कारुआनाचा पराभव केला. त्याचवेळी फ्रान्सच्या फिरोझा अलीरेझाने विद्यमान विश्वविजेत्या चीनच्या डिंग लिरेनचा पराभव केला. या स्पर्धेतील चौथ्या फेरीनंतर नाकामुरा सात गुणांसह अव्वल स्थानावर कायम आहे. तो अलिरेझापेक्षा अर्धा गुण पुढे आहे. कार्लसनचे सहा गुण आहेत आणि तो तिसऱ्या स्थानावर आहे, तर कारुआना पाच गुणांसह पाचव्या आणि लिरेन केवळ 2.5 गुणांसह शेवटच्या स्थानावर आहे.