India’s Golden Year in Sports Year Ender 2025 : भारतीय क्रीडा क्षेत्रासाठी २०२५ हे वर्ष सुवर्ण अक्षरांनी लिहून ठेवण्यासारखे ठरले आहे. आता भारतीय खेळाडू केवळ क्रिकेटपुरते मर्यादित न राहता जागतिक स्तरावर विविध खेळांमध्ये देशाचे नाव उज्ज्वल करत आहेत. खेळाडूंची वैयक्तिक कामगिरी आणि क्रीडा मंत्रालयाचे महत्त्वाचे निर्णय यामुळे भारताची क्रीडा क्षेत्रात नवी ओळख निर्माण झाली आहे. यजमानपदाकडे मोठी पाऊले: ऑलिम्पिक आणि कॉमनवेल्थ – भारताने २०३६ च्या ऑलिम्पिक स्पर्धेच्या यजमानपदासाठी अधिकृतपणे आपली दावेदारी (Bid) सादर केली आहे. यासोबतच क्रीडा चाहत्यांसाठी सर्वात मोठी बातमी म्हणजे २०३० च्या कॉमनवेल्थ गेम्सचे यजमानपद भारताला मिळाले आहे. तब्बल २० वर्षांनंतर या स्पर्धा भारतात परतत असून, अहमदाबादमध्ये या खेळांचे आयोजन केले जाणार आहे. बुद्धिबळात भारतीयांचे विश्वविक्रम – बुद्धिबळाच्या पटलावर भारताने जगाला थक्क केले. वयाच्या अवघ्या १८ व्या वर्षी डी गुकेशने जागतिक बुद्धिबळ चॅम्पियनशिप जिंकून इतिहास रचला. हा किताब जिंकणारा तो जगातील सर्वात तरुण खेळाडू ठरला असून, त्याला ‘खेल रत्न’ पुरस्काराने गौरविण्यात आले. दुसरीकडे, १९ वर्षीय दिव्या देशमुखने फिडे महिला विश्वचषक जिंकून नवी क्रांती केली. अंतिम फेरीत कोनेरू हम्पीचा पराभव करून हे जेतेपद मिळवणारी ती पहिली भारतीय महिला ठरली. हेही वाचा – AUS vs ENG : इंग्लंडच्या ऑस्ट्रेलियातील ऐतिहासिक कसोटी विजयाने भारताची वाढली डोकेदुखी, नेमकं समीकरण काय? पॅरा-अॅथलीट्सची सुवर्ण भरारी – पॅरा-आर्चरीमध्ये शीतल देवीने आपल्या कौशल्याने सर्वांना मंत्रमुग्ध केले. आंतरराष्ट्रीय स्तरावर सुवर्ण आणि रौप्य पदके जिंकत तिने जागतिक क्रमवारीत अव्वल स्थान पटकावले. तसेच, भालाफेकपटू सुमित अंतिलने F64 श्रेणीत सलग तिसऱ्यांदा जागतिक चॅम्पियनशिपमध्ये सुवर्णपदक जिंकून ऐतिहासिक ‘ट्रिपल’ जेतेपद आपल्या नावावर केले. हेही वाचा – Bangladesh Crisis : बांगलादेशातील हिंदूंवरील अत्याचाराचे पडसाद भारतात; केकेआरसह आयपीएलवर बहिष्काराचा इशारा इतर खेळातील प्रमुख यश – इटलीतील ट्युरिन येथे झालेल्या विंटर स्पेशल ऑलिम्पिक स्पर्धेत भारतीय खेळाडूंनी ३३ पदकांची कमाई केली. त्याचबरोबर पहिल्या ऐतिहासिक खो-खो विश्वचषकात भारताच्या पुरुष आणि महिला अशा दोन्ही संघांनी अजिंक्यपद मिळवून आपले वर्चस्व सिद्ध केले. थोडक्यात सांगायचे तर, २०२५ हे वर्ष भारतीय खेळाडूंच्या जिद्द, चिकाटी आणि जागतिक वर्चस्वाचे साक्षीदार ठरले आहे.
