लास व्हेगास : भारताचा 19 वर्षीय युवा ग्रँडमास्टर आर. प्रज्ञानंदने लास व्हेगास येथे झालेल्या फ्रीस्टाइल बुद्धिबळ ग्रँड स्लॅम स्पर्धेत जागतिक क्रमवारीत अव्वल असलेल्या मॅग्नस कार्लसनला दारुण पराभवाची धूळ चारली. चौथ्या फेरीतील हा सामना प्रज्ञानंदने अवघ्या 39 चालींमध्ये जिंकला, ज्यामुळे कार्लसनचा या स्पर्धेतील प्रवास संपुष्टात आला. यापूर्वी डी. गुकेशनेही कार्लसनला पराभूत केले होते, आणि आता प्रज्ञानंदने हा पराक्रम करत भारतीय बुद्धिबळाचा दबदबा पुन्हा सिद्ध केला.

प्रज्ञानंदची दमदार कामगिरी
पांढऱ्या सोंगट्यांसह खेळताना प्रज्ञानंदने सामन्यावर सुरुवातीपासून नियंत्रण राखले. त्याची अचूकता 93.9% होती, तर कार्लसनची अचूकता 84.9% राहिली. 10 मिनिटे आणि 10 सेकंद चाललेल्या या सामन्यात प्रज्ञानंदने 5 वेळा जागतिक विजेता असलेल्या कार्लसनला हरवले. विशेष म्हणजे, प्रज्ञानंदने बुद्धिबळातील क्लासिकल, रॅपिड आणि ब्लिट्झ या तिन्ही प्रारूपांमध्ये कार्लसनवर विजय मिळवला आहे, ज्यामुळे हा त्याच्या कारकिर्दीतील सर्वात मोठा विजय मानला जात आहे.

स्पर्धेतील प्रवास
प्रज्ञानंदने स्पर्धेच्या पहिल्या फेरीत अब्दुसत्तोरोवविरुद्ध काळ्या सोंगट्यांसह बरोबरी साधली. दुसऱ्या फेरीत त्याने असोबायेवर विजय मिळवला, तर तिसऱ्या फेरीत काळ्या सोंगट्यांसह खेळताना केमरला पराभूत केले. चौथ्या फेरीत कार्लसनला हरवून त्याने सर्वांना आश्चर्यचकित केले. सामना जिंकल्यानंतर प्रज्ञानंद प्रतिक्रिया देताना म्हणाला, “मला सध्या क्लासिकलपेक्षा फ्रीस्टाइल बुद्धिबळ खेळायला जास्त आवडते.”

गुकेशनेही दाखवली होती ताकद
यापूर्वी डी. गुकेशने क्रोएशियामध्ये कार्लसनला 49 चालींमध्ये पराभूत करत जेतेपद पटकावले होते. कार्लसनने गुकेशला कमी लेखले होते, पण गुकेशने आपल्या खेळाने त्याला सणसणीत उत्तर दिले. आता प्रज्ञानंदच्या या विजयाने भारतीय बुद्धिबळपटूंची नवी पिढी जागतिक स्तरावर आपली छाप पाडताना दिसत आहे.