FIDE chess : भारतातील बुद्धिबळ जगतातून एक नवीन आणि आनंदाची बातमी समोर आली आहे. खरं तर, आंतरराष्ट्रीय बुद्धिबळ महासंघाने एप्रिल महिन्याची क्रमवारी जाहीर केली आहे, ज्यामध्ये 21 वर्षीय युवा भारतीय बुद्धिबळपटूने अनुभवी भारतीय खेळाडू विश्वनाथन आनंदला मागे टाकत देशाचा नवीन नंबर 1 बुद्धिबळपटू होण्याचा मान मिळवला आहे.
21 वर्षीय अर्जुन एरिगासीने ( Arjun Erigaisi ) बुद्धिबळाच्या जगात खळबळ उडवून दिली आहे. आंतरराष्ट्रीय बुद्धिबळ महासंघाच्या एप्रिल महिन्याच्या जागतिक क्रमवारीत तो 9व्या क्रमांकावर आहे. यानंतर अर्जुन एरिगासी हा विश्वनाथन आनंदला मागे टाकून देशाचा नवा नंबर 1 बुद्धिबळपटू बनला आहे. अर्जुन पहिल्यांदाच FIDE रेटिंग लिस्टच्या टॉप 10 मध्ये आला आहे. तो जागतिक क्रमवारीत 2756 रेटिंगसह 9व्या क्रमांकावर आहे. विश्वनाथन आनंद 11व्या स्थानी घसरला आहे, त्याचे रेटिंग 2751 आहे.
युवा खेळाडूने आनंदला पिछाडीवर टाकण्याची ही पहिलीच वेळ नाही. याआधी डी गुकेशनेही ही कामगिरी केली होती. मात्र यावेळी अर्जुनने एक पाऊल पुढे टाकले आहे. तर इतर भारतीयामध्ये रमेशबाबू प्रज्ञानंधा हा 2747 रेटिंगसह 14 व्या तर गुकेश हा 2743 रेटिंगसह 16 व्या आणि विदित गुजराती हा 2727 रेटिंगसह 25 व्या नंबर आहे.
अशाप्रकारे अर्जुन बनला देशाचा नंबर वन बुद्धिबळपटू…
अर्जुनचे हे यश त्याच्या नुकत्याच खेळल्या गेलेल्या 5व्या शेन्झेन बुद्धिबळ मास्टर्स आणि बुंदेसलिगा वेस्टमधील उत्कृष्ट कामगिरीचे परिणाम आहे. जिथे त्याने 8.3 एलो रेटिंग पॉइंट्स मिळवले. सध्या तो ग्रेन्के चेस ओपन 2024 मध्येही आपली ताकद दाखवत आहे. येथे त्याने आतापर्यंत 7 पैकी 6 गुण मिळवले आहेत. मात्र, तो अव्वल तीन खेळाडूंपेक्षा अर्धा गुण मागे आहे.
The April #FIDErating lists are out!
The most notable changes: the world #1 Junior, 🇺🇿 Nodirbek Abdusattorov, gained 15 rating points and is now #4 in the world, while 21-year-old 🇮🇳 Arjun Erigaisi gained 8 and now ranks #9; both players entered the top 10 for the first time.… pic.twitter.com/k0mQSPe45b
— International Chess Federation (@FIDE_chess) April 1, 2024
जागतिक क्रमवारीत अव्वल 1, 2 आणि 3 वर कोण आहे?
जागतिक क्रमवारीबद्दल बोलायचे झाले तर मॅग्नस कार्लसन अजूनही अव्वल स्थानावर आहे. त्याचे रेटिंग 2830 आहे. त्याच्या खालोखाल अमेरिकेचा फॅबियानो कारुआना 2803 गुणांसह दुसऱ्या स्थानावर असून हिकारू नाकामुरा 2789 गुणांसह तिसऱ्या स्थानावर आहे.
भारतीय महिला बुद्धिबळ क्रमवारी…
भारतीय महिला बुद्धिबळपटूंबद्दल बोलायचे झाले तर, पहिल्या 15 मध्ये कोणताही मोठा बदल झालेला नाही. कोनेरू हंपी 2546 गुणांसह पाचव्या, हरिका द्रोणवल्ली 2503 गुणांसह 11व्या आणि रमेशबाबू वैशाली 2475 गुणांसह 15व्या स्थानावर आहे. वैशाली ही एकमेव भारतीय महिला खेळाडू आहे जी FIDE महिला कैंडिडेट्स स्पर्धेत सहभागी होणार आहे.
