Chandrashekhar Bawankule – मराठा उद्योजक संघटनेचा एमईए इंटरनॅशनल बिझनेस एक्स्पो विकसित महाराष्ट्रासाठी उपयुक्त असून, या एक्स्पोमध्ये आधुनिक तंत्रज्ञान, बांधकाम, कृषी आणि इनोव्हेशन हे सुंदर आणि माहितीपूर्ण तयार केल्याचे सांगत महसूलमंत्री चंद्रशेखर बावनकुळे यांनी संघटनेच्या कार्याचे कौतुक केले. मराठा उद्योजक संघटनेच्या वतीने कृषी महाविद्यालय मैदान सिंचननगर येथे आयोजित एमईए इंटरनॅशनल बिझनेस एक्स्पो-२०२६ च्या उद्घाटनप्रसंगी ते बोलत होते. या वेळी केंद्रीय विमान वाहतूक राज्यमंत्री मुरलीधर मोहोळ, खासदार श्रीरंग बारणे, माजी खासदार रवींद्र गायकवाड, महापौर मंजुषा नागपुरे, स्थायी समितीचे अध्यक्ष श्रीनाथ भिमाले, मराठा उद्योजक संघटनेचे अध्यक्ष विक्रम गायकवाड, माजी अध्यक्ष अंकुश आसबे, अरुण निम्हण यासह असोसिएशनचे पदाधिकारी, उद्योजक उपस्थित होते. राज्यात अधिकाधिक व्यावसायिक, उद्योजक निर्माण व्हावेत, तरुणांना रोजगार मिळावा, तसेच मराठा समाजातील संघटित व्यवसाय, व्यापार करून विकसित भारताकडे वाटचाल करण्यासाठी हा एक्पो महत्त्वपूर्ण आहे. मुख्यमंत्री देवेंद्र फडणवीस यांच्या मार्गदर्शनखाली औद्योगिकीकरण, शेती रोजगार, रोजगारनिर्मितीवर भर देण्यात येत आहे. दावोसमधील करारामुळे सुमारे १५ लाख रोजगार निर्मिती होण्यास मदत होणार आहे, असे बावनकुळे म्हणाले. मोहोळ म्हणाले, एमईए इंटरनॅशनल बिझनेस एक्स्पो मराठा समाजातील उद्योजकांच्या सर्वांगीण विकासाचे सर्वोत्तम व्यासपीठ आहे. त्यामध्ये उद्योजकांनी सामाजिक जाणीवेतून समाजापुढे एक आदर्श निर्माण केला आहे. विक्रम गायकवाड आणि राजेश कुऱ्हाडे आणि अंकुश आसबे यांनी मनोगत व्यक्त केले. अजितदादा परत या अभिनेता अवधूत गुप्ते यांनी खुपते तिथे गुप्तेच्या माध्यमातून मंत्री बावनकुळे यांची प्रकट मुलाखत घेतली. त्या वेळी बावनकुळे यांना आवडत्या व्यक्तीला फोन लावा, असे म्हटल्यावर त्यांनी फोन कानाला लावला आणि म्हणाले, हॅलो आदरणीय अजितदादा अर्थसंकल्प सादर करायचा आहे, वापस या ना, अजितदादा परत या, महाराष्ट्राची जनता वाट पाहात आहे.