Chandrakant Patil – गणेशोत्सवात पुणेकरांच्या हृदयात भक्तिभाव जागला पाहिजे, छातीत धडकी भरता कामा नये, अशा शब्दांत उच्च व तंत्रशिक्षणमंत्री चंद्रकांत पाटील यांनी गणेश मंडळांना आवाहन केले आहे. डीजे, लेझर बीमच्या अतिवापरामुळे ज्येष्ठ नागरिक, लहान मुले आणि रुग्णांना होणारा त्रास लक्षात घेऊन यंदा या गोष्टींचा वापर पूर्णपणे टाळावा. कायद्याचे पालन, गणेशोत्सवाचे सामाजिक मांगल्य टिकवून उत्साहात सण साजरा करा, असे आवाहनही पाटील यांनी केले.

गणेशोत्सव हा केवळ धार्मिक नव्हे, तर लोकमान्य टिळकांच्या विचारांचा सामाजिक आणि सांस्कृतिक वारसा आहे. या उत्सवाचे पावित्र्य टिकवताना नागरिकांच्या आरोग्याची काळजी घेणे हे कार्यकर्त्यांचे कर्तव्य आहे, असे सांगून चंद्रकांत पाटील म्हणाले, डीजेचा प्रचंड आवाज आणि लेझर बीमच्या अतिवापरामुळे लहान मुले, वृद्ध आणि रुग्णांना गंभीर त्रास होतो.

त्यामुळे कोणताही संवेदनशील कार्यकर्ता अशा घातक गोष्टींचे समर्थन करणार नाही, उलट ढोल-ताशा व अथर्वशीर्ष पठणासारख्या चांगल्या प्रथांचा वारसा पुढे नेईल, असा विश्वास त्यांनी व्यक्त केला. गणेशोत्सव म्हणजे डीजे अशी भ्रामक कल्पना कार्यकर्त्यांच्या मनात नाही, तर असा आग्रह धरणारे मोजकेच लोक आहेत.

कार्यकर्ता हा समाजाचाच घटक असल्याने नागरिकांच्या त्रासाची त्याला जाणीव आहे. कोरोना काळात कार्यकर्त्यांनी समाजहितासाठी विसर्जन मिरवणूक रद्द करण्याची दाखवलेली सकारात्मक भूमिका लक्षात घेता, यंदाही निर्बंधमुक्त गणेशोत्सव साजरा करताना नागरिकांच्या आरोग्याची हेळसांड होणार नाही, याची जबाबदारी प्रत्येकाची सर्वांचीच आहे, असे पाटील म्हणाले.