Ganeshotsav Shopping – अवघ्या काही दिवसांवर आलेल्या गणेशोत्सवाच्या खरेदीसाठी शनिवार-रविवारच्या सुट्टीचा योग साधत शनिवारी पुणेकरांनी मध्यवर्ती बाजारपेठांमध्ये गर्दी केली होती. रविवार पेठ, बोहरी आळी, लक्ष्मी रस्ता, मंडई, तुळशीबाग परिसरात खरेदीसाठी गर्दी झाली होती. येत्या काही दिवसांत व्यापाऱ्यांची मालवाहू वाहने, खरेदीदारांच्या वाहनांची गर्दी आणि अरुंद रस्ते यामुळे तासनतास कोंडी होण्याची शक्यता आहे.

कोंडीला तोंड देण्यासाठी या परिसरातील वाहतुकीचे पोलीस नव्याने नियोजन करणार आहेत. खरेदीसाठी दररोज मोठ्या संख्येने नागरिक बाहेर पडतात. त्यातच व्यापाऱ्यांकडे माल घेऊन येणारी वाहने तसेच खरेदीदारांची खासगी वाहने अरुंद रस्त्यांवर आल्याने वाहतुकीचा वेग मंदावतो. परिणामी आसपासच्या रस्त्यांवर कोंडी होते.

वाहतूक नियोजनाबाबत चर्चा करण्यासाठी व्यापारी संघटनांच्या प्रतिनिधींना पोलिसांनी आमंत्रित केले आहे. व्यापाऱ्यांना तीन दिवसांपूर्वीच निरोप दिला होता. सोमवारी बाजारपेठ बंद असल्याने त्यादिवशी संघटनांसोबत बैठक घेण्याचा निर्णय घेण्यात आला. बैठकीत मालवाहू वाहनांची ये-जा, पार्किंग तसेच गर्दीच्या काळातील वाहतूक व्यवस्थेबाबत चर्चा होईल, अशी माहिती फरासखाना वाहतूक विभागाचे सहायक पोलीस निरीक्षक राजीव म्हात्रे यांनी दिली.

पीएमपी मार्ग बदलणार
शिवाजी रस्त्यावरील पीएमपी बसच्या वाहतुकीमुळेही कोंडी होत असल्याने पोलिसांनी पीएमपी प्रशासनाला पत्र दिले आहे. शिवाजी रस्त्यावरील पीएमपी वाहतूक पर्यायी मार्गाने वळवावी किंवा या मार्गावर मिनी बस सोडाव्यात, अशी सूचना केली आहे.सध्या कोंडीची परिस्थिती पाहून वाहतूक नियोजन केले जाते. गणेशोत्सवाच्या पार्श्वभूमीवर बाजारपेठेतील गर्दी आणखी वाढणार असल्याने पोलिसांनी वाहतूक सुरळीत करण्यासाठी पावले उचलली आहेत.