सांगली : एकेकाळी कुस्तीच्या आखाड्यांतील ‘डबल महाराष्ट्र केसरी’ म्हणून गाजलेले, तसेच ठाकरेंच्या शिवसेनेचे मातब्बर चेहरा असलेले चंद्रहार पाटील यांनी अखेर धनुष्यबाणाकडे वळत शिंदे गटात प्रवेश करण्याचा निर्णय घेतला आहे. आज (सोमवार) संध्याकाळी उपमुख्यमंत्री एकनाथ शिंदे यांच्या उपस्थितीत ठाण्यात त्यांच्या शेकडो समर्थकांसह चंद्रहार पाटील अधिकृत पक्षप्रवेश करणार आहेत.

या प्रवेशाने पश्चिम महाराष्ट्रातील राजकारणात नव्या समीकरणांची नांदी झाली असून, उद्धव ठाकरे गटाला सांगलीत मोठा धक्का बसला आहे.

ठाकरेंची साथ सोडत ‘शिंदे’ आखाड्यात उतरले

राजकारण आणि कुस्ती या दोन्ही क्षेत्रात नावलौकिक मिळवलेले चंद्रहार पाटील यांनी लोकसभा निवडणुकीआधी ठाकरेंच्या शिवसेनेत प्रवेश केला होता. सांगली मतदारसंघातून निवडणूक लढवली, मात्र त्यांना पराभवाचा सामना करावा लागला. निवडणुकीनंतर त्यांनी जिल्ह्यात फारशी सक्रियता दाखवली नव्हती, अशी टीका आता ठाकरे गटातून केली जात आहे.

सोशल मीडियातून जाहीर घोषणा

पाटील यांनी रविवारी रात्रीच सोशल मीडियावर पोस्ट करत पक्षप्रवेशाची माहिती दिली. “शेकडो कार्यकर्त्यांसह ठाण्यात शिंदे गटात प्रवेश करणार आहोत,” अशी घोषणा त्यांनी ट्वीटमध्ये केली. त्यांच्या या घोषणेनंतर सांगलीत राजकीय घडामोडींना वेग आला.

संजय शिरसाठांचा सूचक इशारा ठरला खरा

या पार्श्वभूमीवर शिंदे गटाचे मंत्री संजय शिरसाठ यांनी काही दिवसांपूर्वीच ‘सोमवारी चंद्रहार पाटलांचा पक्षप्रवेश होईल, हिंमत असेल तर रोखून दाखवा’, असा थेट इशारा ठाकरे गटाला दिला होता. अखेर त्यांच्या घोषणेला प्रत्युत्तर मिळालं आहे.

ठाकरे गटाकडून तीव्र प्रतिक्रिया

चंद्रहार पाटील यांनी सोबत सोडल्याने ठाकरे गटामध्ये नाराजीचा सूर आहे. सांगलीतील काही स्थानिक नेत्यांनी, “ते गेले तरी आमच्यावर काही फरक पडत नाही. मैदान गाजवणारी माणसं आजही शिवसेनेतच आहेत,” अशा शब्दांत त्यांच्यावर टीका केली.