नवी दिल्ली : सोमवारचा दिवस इंटरनेट युझर्ससाठी गोंधळाचा ठरला आहे. ‘कॅन्व्हा’ (Canva), ‘अमेझॉन वेब सर्व्हिसेस’ (AWS) आणि ‘स्नॅपचॅट‘ (Snapchat) सह अनेक मोठे ऑनलाईन प्लॅटफॉर्म एकाच वेळी कोलमडले. या तांत्रिक समस्येमुळे जगभरातील हजारो युझर्सना मनस्ताप सहन करावा लागला.

‘AWS’ आउटेजचा मोठा परिणाम:

‘अमेझॉन वेब सर्व्हिसेस’ (AWS) मध्ये आलेल्या मोठ्या तांत्रिक बिघाडामुळे अनेक ॲप्स आणि सेवा ठप्प झाल्या. ‘अमेझॉन प्राईम व्हिडीओ’, ‘पर्प्लेक्सिटी एआय’ (Perplexity AI) आणि ‘स्नॅपचॅट’ सारख्या सेवा काम करत नसल्याच्या तक्रारी युझर्सनी नोंदवल्या. ‘डाऊनडिटेक्टर’नुसार, ‘AWS’ मुळे गेल्या 24 तासांत 1,100 हून अधिक तक्रारी नोंदल्या गेल्या, ज्यापैकी बहुतांश अमेरिका आणि जगभरातून होत्या. याच कारणामुळे ‘रॉब्लॉक्स’, ‘मॅकडोनाल्ड्स’, ‘कोइनबेस’, ‘कॅन्व्हा’ आणि ‘गुडरीड्स’ सारखे अनेक प्लॅटफॉर्म प्रभावित झाले.

युझर्सचा संताप ‘एक्स’वर व्यक्त:

या अचानक आलेल्या आउटेजमुळे संतप्त झालेल्या युझर्सनी ‘एक्स’ (पूर्वीचे ट्विटर) वर आपला संताप व्यक्त केला. एका युझरने अनेक प्लॅटफॉर्मच्या स्क्रीनशॉटसह लिहिले, “काय चालले आहे? सर्व काही डाऊन आहे.” तर दुसऱ्याने “जगभरात इतका मोठा आउटेज, हा सायबर हल्ल्याचा परिणाम आहे का?” असा प्रश्न विचारला.

‘स्नॅपचॅट’वर सर्वाधिक गोंधळ दिसला. सुमारे 9,000 युझर्सनी ॲप काम करत नसल्याची तक्रार केली. 91% युझर्सना लॉग इन करण्यात, तर 6% युझर्सना कंटेंट अपलोड करण्यात अडचण आली. यावर युझर्सनी ‘एक्स’वर मजेशीर प्रतिक्रिया दिल्या. एका युझरने लिहिले, “स्नॅपचॅट डाऊन झाले आहे, अचानक सर्वांचा आरसा सर्वात भयानक ॲप बनला!”

‘पर्प्लेक्सिटी AI’चे स्पष्टीकरण:

‘पर्प्लेक्सिटी एआय’लाही या समस्येचा फटका बसला. सीईओ अरविंद श्रीनिवास यांनी ‘एक्स’वर स्पष्टीकरण देत सांगितले, “पर्प्लेक्सिटी सध्या ‘AWS’मधील समस्येमुळे डाऊन आहे. आम्ही हे ठीक करण्यासाठी काम करत आहोत.”

भारतातही ‘कॅन्व्हा’ डाऊन:

याव्यतिरिक्त, सोमवारी भारतातही ‘कॅन्व्हा‘ ॲपमध्ये तांत्रिक बिघाड झाल्याच्या तक्रारी आल्या. अनेक युझर्स ॲप उघडू शकले नाहीत आणि ‘सर्व्हर एरर’चा संदेश दिसत होता. ‘आयओएस’ ॲपवरही “आमच्या बाजूने काहीतरी गडबड झाली आहे” असा संदेश दिसत होता. या आउटेजवर ‘कॅन्व्हा’ने अद्याप कोणतेही अधिकृत वक्तव्य केलेले नाही. ‘डाऊनडिटेक्टर’नुसार, काही मिनिटांतच 200 हून अधिक तक्रारी नोंदवल्या गेल्या होत्या.