Iran Attacks Amazon: ॲमेझॉनवर इराणचा ‘सर्जिकल स्ट्राईक’! बहरीनमधील डेटा सेंटरवर भीषण हल्ला; जगभरात इंटरनेट ठप्प होणार?

Iran Attacks Amazon: मध्यपूर्वेतील तणावाचा आता जागतिक टेक क्षेत्राला मोठा फटका बसला आहे. इराण आणि अमेरिका यांच्यातील संघर्ष आता केवळ सीमेपुरता मर्यादित न राहता ‘सायबर’ आणि ‘फिजिकल वॉरफेअर’च्या धोकादायक पातळीवर पोहोचला आहे. इराणने बहरीनमध्ये असलेल्या ॲमेझॉन वेब सर्व्हिसेस (AWS) च्या डेटा सेंटरवर ड्रोन हल्ला केल्याने जगभरात खळबळ उडाली आहे.

नक्की काय घडले? वृत्तानुसार, इराणने बहरीनमधील ॲमेझॉनच्या सुविधेला लक्ष्य केले आहे. या ड्रोन हल्ल्यामुळे डेटा सेंटरमध्ये भीषण आग लागली आणि वीजपुरवठा खंडित झाला. बहरीनच्या गृह मंत्रालयाने सोशल मीडिया प्लॅटफॉर्म ‘X’ वर माहिती दिली की, एका कंपनीच्या युनिटला आग लागली असून नागरी संरक्षण (Civil Defense) दल आग विझवण्याचे काम करत आहे.

हल्ल्याचे मुख्य कारण काय? इराणी प्रसारमाध्यमांच्या दाव्यानुसार, बहरीनमधील हे डेटा सेंटर अमेरिकन लष्करी आणि गुप्तचर हालचालींना तांत्रिक पाठबळ पुरवत होते. याच कारणामुळे इराणने या केंद्राला लक्ष्य केले आहे. विशेष म्हणजे, इराणने यापूर्वीच मेटा, गुगल, ॲपल आणि मायक्रोसॉफ्ट यांसारख्या १८ बड्या अमेरिकन कंपन्यांच्या डेटाबेसला लक्ष्य करण्याची धमकी दिली होती.

हेही वाचा – War Updates: ट्रंप यांना मोठा धक्का ! युद्धाच्या पार्श्वभूमीवर ब्रिटनचा बदलता सूर, ‘नाटो’मधून बाहेर पडण्याचा अमेरिकेचा इशारा

AWS वर झालेला परिणाम आणि जागतिक धोका – ॲमेझॉन वेब सर्व्हिसेस (AWS) ही जगातील सर्वात मोठी क्लाउड सेवा देणारी कंपनी आहे. या हल्ल्यामुळे अनेक सेवांवर परिणाम झाला आहे. इमारतीचे नुकसान, वीजपुरवठा खंडित होणे आणि फायर सप्रेशन सिस्टीममधून पाणी गळती झाल्याने सर्व्हरवर परिणाम झाला आहे. बँकिंग, डिजिटल पेमेंट, डिलिव्हरी ॲप्स आणि एंटरप्राइझ सॉफ्टवेअर सेवांमध्ये व्यत्यय आला आहे. AWS च्या सेवा भारतातही मोठ्या प्रमाणावर वापरल्या जातात, त्यामुळे जागतिक स्तरावर इंटरनेट सेवा ठप्प होण्याचा धोका निर्माण झाला आहे.

याच महिन्यात बहरीनमधील AWS सुविधांवर झालेला हा दुसरा हल्ला आहे. यापूर्वी मार्चच्या सुरुवातीला यूएई आणि बहरीनमध्ये अशाच प्रकारचे ड्रोन हल्ले झाले होते.

अमेरिकेचा इशारा आणि वाढता संघर्ष – या भीषण हल्ल्यानंतर अमेरिकेचे राष्ट्राध्यक्ष डोनाल्ड ट्रम्प यांनी कडक पवित्रा घेतला आहे. “जर अमेरिकन कंपन्या किंवा पायाभूत सुविधांवर कोणताही हल्ला झाला, तर त्याला लष्करी आणि आर्थिक अशा दोन्ही स्तरावर चोख प्रत्युत्तर दिले जाईल,” असा इशारा त्यांनी दिला आहे.

इराण आता डेटा सेंटर्सना नवीन ‘युद्धभूमी’ म्हणून पाहत आहे, कारण आधुनिक काळात क्लाउड कॉम्प्युटिंग आणि आर्टिफिशिअल इंटेलिजन्स (AI) हे कोणत्याही देशाच्या शक्तीचे मुख्य केंद्र मानले जातात.